स्याङजा – आठ महिनादेखिकाे तलब नपाएपछि स्याङ्जाको गल्याङ नगरपालिकाद्वारा सञ्चालित गल्याङ नगर अस्पतालमा स्वास्थ्यकर्मीले नै ताला लगाएका छन् । कोरोना भाइरसको सङ्क्रमण फैलिइरहेकाे बेलामा पनि बिना तलब काम गर्नुपरेको भन्दै कर्मचारीहरुले नै अस्पतालको मूल गेटमा ताला लगाएका हुन् ।

अस्पतालमा कार्यरत डाक्टर तथा प्रबन्धकसहित १७ जना कर्मचारीहरुले संयुक्त विज्ञप्ति निकालेर तालाबन्दी गरेका हुन् । गएकाे भदौ १ गतेदेखिको तलब बाँकी रहेको आन्दोलनरत कर्मचारीहरुको भनाइ छ । आफूहरुले कोरोनाको त्रासका बीच सेवा दिइरहँदा पनि नगरपालिकाले बेवास्ता गरेको उनीहरुको गुनासाे छ ।

'तलबको त कुरै छाेडौँ हामीले त नियुक्त पत्रसमेत पाएनौँ', एक कर्मचारीले भने । अस्पतालका कर्मचारीहरुबीच नै तलब र सेवा सुविधामा विभेद रहेको एक कर्मचारीले बताए । यसअघि याे अस्पताल गल्याङ सामुदायिक अस्पतालका नाममा सञ्चालन गरिँदै आएको थियो । जसको व्यवस्थापन एक स्थानीय समितिले गर्थ्याे । 

यसैबीच गल्याङ नगर अस्पतालका अध्यक्ष एवं गल्याङ नगरपालिकाका प्रमुख भुपराज अधिकारीले तलब मिलानको काम भइरहेको बताउनुभयो । उहाँले समस्या त्यति जटिल नभएको र एक/दुई दिनमा नै समाधान हुने जानकारी दिनुभयो । गल्याङ क्षेत्रको एक मात्रै अस्पतालमा ताला लागेपछि स्थानीयवासी भने चिन्तीत बनेका छन् ।