त्रिभुवन विमानस्थल सञ्चालनकाे तयारी तीव्र पारिँदै

 जेठ १८, २०७७ आइतबार १८:५३:५८ | उज्यालो सहकर्मी
unn.prixa.net

काठमाण्डाै – धावनमार्ग निर्माणकाे काम सम्पन्न भएपछि त्रिभुवन अन्तर्राष्ट्रिय विमानस्थल सञ्चालनको तयारी तीव्र पारिएको छ । कोरोना सङ्क्रमण रोकथामकाे लागि आन्तरिक तथा अन्तर्राष्ट्रिय उडानहरु बन्द रहेको अवस्थामा धावनमार्ग निर्माणको काम सकिएको हो ।

लामो समयदेखि विभिन्न कारणले धावनमार्ग निर्माणको काम हुन नसके पनि उडानहरु प्रतिबन्ध भएपछि कामले तीव्रता पाएको हो । विमानस्थलको दक्षिणतर्फ तीन सय मिटरको धावनमार्ग निर्माण गरिएको छ । धावनमार्ग विस्तारपछि सञ्चालनको तयारी तीव्र पारिएको छ ।

कोरोना महामारीले विश्व प्रभावित भइरहेको बेला सामाजिक दुरी कायम गर्दै विमानस्थल सञ्चालनको तयारी भइरहेको त्रिभुवन अन्तर्राष्ट्रिय विमानस्थलका महाप्रबन्धक देवेन्द्र केसीले बताउनुभयो । विभिन्न देशमा अलपत्र नागरिकहरुलाई स्वदेश ल्याउन तयारी भइरहेको उहाँले बताउनुभयो ।

सरकारले सञ्चालनको सूचना जारी नगर्दासम्म सम्पूर्ण स्रोत र साधन प्रयोग गरेर सञ्चालनको तयारी भइरहेको उहाँले बताउनुभयो । विमानस्थलमा सामाजिक दुरी कायम गरी स्यानिटाइर र मास्क प्रयोग अनिवार्य गरिएको छ ।

त्रिभुवन अन्तर्राष्ट्रिय विमानस्थल अन्तर्राष्ट्रिय नागरिक उड्डयन सङ्गठनले लामो समयदेखि धावनमार्ग विस्तारकाे लागि पटक–पटक दबाब दिँदै आएको थियो । तर विमानस्थल बन्द गरेर काम गर्न सक्ने अवस्था नभएपछि निर्माण हुन सकेको थिएन । पछिल्लो समय लकडाउन र राष्ट्रिय तथा अन्तर्राष्ट्रिय उडानहरु बन्द भएपछि छोटो समयमै धावनमार्ग विस्तारको काम सम्पन्न भएको हो ।

विमास्थलमा अब एप्रोच लाइट जडानको काम मात्रै बाँकी रहेको छ । लकडाउनकाे कारण विदेशबाट सामान ल्याउन नसकिएकाेले लाइट लडानको काम थाँती रहेको उहाँले बताउनुभयो । धावनमार्ग निर्माण भएपछि विमानहरु सजिलै अवतरण र उडान भर्न सक्नेछन् । 

अन्तिम अपडेट: चैत १३, २०८०

तपाईको प्रतिक्रिया