साउनकाे अन्तिम साेमवार, पशुपतिनाथसहित देशभरका शिवालयमा भक्तजनकाे भीड (तस्वीरहरू)

काठमाण्डाै – आज साउन महिनाको अन्तिम सोमवार काठमाण्डाैकाे पशुपतिनाथलगायत देशभरका शिवालयहरूमा बिहानैदेखि भक्तजनको भीड लागेको छ ।

बिहान झमझम पानी परे पनि भक्तजनहरू लामबद्ध भएर मन्दिरमा पुगेका थिए । दिउँसो पनि मन्दिरमा उत्तिकै भीड लागिरहेको छ । बिहान ३ बजेदेखि खुलेका पशुपतिनाथ मन्दिरका चार ढोका बेलुका आरतीपछि राति ८ बजेसम्म खुला रहनेछन् ।

आज पशुपतिनाथमा दर्शन व्यवस्थापनलाई थप प्रभावकारी, सुरक्षित र व्यवस्थित बनाउन कोषका सबै पदाधिकारी तथा कर्मचारी खटिएका छन् ।

काठमाण्डौ उपत्यकाका प्रसिद्ध शिवालय गोकर्णेश्वर, नागेश्वर, डोलेश्वर र वसन्तपुर दरबार क्षेत्रको ‘सानो पशुपतिनाथ’ भनेर चिनिने मक्खन महादेवलगायत ठूला–साना सबै शिव मन्दिरमा बिहानैदेखि भक्तजनको लाइन लागेको छ ।

यस्तै काठमाण्डाै उपत्यकाबाहिर देशभर रहेका शिवालयहरूमा पनि भक्तजनको भीड छ ।