पीएसजीलाई हराउँदै लेन्सलाई पहिलो पटक सुपर कपको उपाधि

काठमाण्डौ — लेन्सले पेरिस सेन्ट जर्मेन (पिएसजी) लाई १–० ले पराजित गर्दै पहिलोपटक सुपर कप (ट्रोफे डेस च्याम्पियन्स)को उपाधि जितेको छ ।

कुप डे फ्रान्सको गएको सिजनको विजेता लेन्सका लागि थाउभिनले ३२औं मिनेटमा गोल गरे । तर, त्यसको ७ मिनेटपछि किलियन एन्टोनियोले सिधै रातो कार्ड पाएपछि लेन्स १० खेलाडीमा सीमित भयो ।

पिएसजीले शुरुआतदेखि नै आक्रमणलाई तीव्रता दिए पनि गोल गर्न सकेन । गएको सिजन लिग वानको उपाधि दौडमा पिएसजीलाई सबैभन्दा कडा चुनौती दिएको लेन्स अन्तमा च्याम्पियनभन्दा ६ अंक पछाडि रहेको थियो ।

यद्यपि, कुप डे फ्रान्सको उपाधि जित्दै उत्कृष्ट सिजन पूरा गरेको थियो । यसपटक डिनो टोपमोलरको नेतृत्वमा लेन्सले अर्को महत्वपूर्ण उपाधि थपेको छ । लेन्सको यो पहिलो सुपर कप उपाधि हो । लेन्सले यसअघि सन् १९९८ मा एकपटक मात्र यो प्रतियोगिता खेलेको थियो ।

त्यतिबेला पिएसजीसँग १–० ले पराजित भएको लेन्सले यसपटक भने त्यही प्रतिद्वन्द्वीलाई हराउँदै उपाधि आफ्नो नाममा लेखायो । पिएसजीले पछिल्ला चार संस्करणमा लगातार सुपर कप  जितेको थियो ।

कीर्तिमानी १५औं उपाधि जित्ने लक्ष्यमा रहेको पिएसजीले खेलमा २२ प्रहार गरे पनि गोल निकाल्न सकेन ।