एनपीएलको तेस्रो सिजन पनि न्युजिल्यान्डका कुगेलेइनले सुदूरपश्चिमबाटै खेल्ने

काठमाण्डौ — न्युजिल्यान्डका बलर स्कट कुगेलेइनलाई सुदूरपश्चिम रोयल्सले नेपाल प्रिमियर लिग (एनपीएल) को तेस्रो सिजनमा पनि निरन्तरता दिने भएको छ ।

सुदूरपश्चिमले यसअघि इंग्ल्यान्डका सेफ जैबलाई अनुबन्ध गरिसकेको छ भने कुगेलेइनलाई दोस्रो विदेशी खेलाडीका रूपमा भित्र्याएको हो । कुगेलेइनले एनपीएलको अघिल्ला दुई सिजनमा पनि सुदूरपश्चिमबाटै खेलेका थिए ।

उनले पहिलो सिजनमा १७ र दोस्रो सिजनमा १० विकेट लिएका थिए । कुगेलेइनले सुदूरपश्चिममा फर्किन पाउँदा उत्साहित रहेको बताएका छन् । सुदूरपश्चिमका प्रमुख कार्यकारी अधिकृत प्रकाश खड्काले कुगेलेइनबाट यसअघिकै जस्तो प्रदर्शनको अपेक्षा गरेको बताएका छन् ।

तेस्रो संस्करणका लागि सुदूरपश्चिमले कप्तान दीपेन्द्रसिंह ऐरीसहित विनोद भण्डारी, आरिफ शेख, इशान पाण्डे, अभिनाश बोहरा, हेमन्त धामी र हिक्मत महरालाई  कायम राखेको छ ।

यसैगरी टोलीले अक्सनबाट दीपक बोहरा, मिलन बोहरा, टेक रावत, अनिल खरेल, सचिन भट्ट र आयुव चन्दलाई अनुबन्ध गरेको छ ।