चीनको चाङ ई–७ चन्द्र अभियान प्रक्षेपणको अन्तिम तयारीमा

चीनले आफ्नो महत्वाकांक्षी चन्द्र अन्वेषण अभियान ‘चाङ’ई–७’ प्रक्षेपणका लागि आवश्यक सम्पूर्ण तयारी अन्तिम चरणमा पुर्‍याएको छ ।

चीनको म्यान्ड स्पेस एजेन्सी (सीएमएसए) का अनुसार मिसनका लागि प्रयोग हुने चाङ’ई–७ चन्द्रयान र लङ मार्च–५ वाई १४ वाहक रकेटलाई हिजो दक्षिण चीनको हेनान प्रान्तको वेनचाङ स्पेसक्राफ्ट लन्च साइटको प्रक्षेपण क्षेत्रमा ठाडो अवस्थामा स्थानान्तरण गरिएको छ ।

चाङ’ई–७ चन्द्रयान र लङ मार्च–५ वाई १४ रकेटलाई गएको अप्रिल र जुलाईमा प्रक्षेपण स्थलमा पु¥याइएको थियो । प्रक्षेपण स्थलका भौतिक पूर्वाधार तथा उपकरणहरू पनि सञ्चालनका लागि तयार अवस्थामा रहेका चिनियाँ समाचार संस्था सिन्ह्वाले जनाएको छ ।

प्रक्षेपणअघि गरिने प्राविधिक जाँच, संयुक्त परीक्षण तथा इन्धन भर्ने लगायतका काम निर्धारित कार्यतालिकाअनुसार अघि बढाइने जनाइएको छ ।

चाङ’ई–७ मिसनको मुख्य उद्देश्य चन्द्रमाको दक्षिणी ध्रुव क्षेत्रमा उच्च सटीकताका साथ सफ्ट ल्यान्डिङ गर्ने तथा चन्द्र सतहमा हिँड्ने र उफ्रनेजस्ता अत्याधुनिक प्रविधिको परीक्षण गर्नु हो । मिसनले चन्द्रमाको स्थायी रूपमा छायामा रहने क्रेटरहरूको समेत विस्तृत अन्वेषण गर्नेछ ।