युरोपमा पहिलो पटक चालक नभएको ‘रोबोट्याक्सी’ सेवा शुरू

विश्वप्रसिद्ध राइड–हेलिङ प्लेटफर्म उबरले युरोपमै पहिलो पटक क्रोएशियाको राजधानी जाग्रेबमा आफ्नो ‘रोबोट्याक्सी’ अर्थात् (चालकविहीन ट्याक्सी) सेवा शुरुआत गरेको छ ।

क्रोएशियाली स्वायत्त कम्पनी भर्नसँगको सहकार्यमा अस्ति बुधवारदेखि चालकविहीन ट्याक्सी सञ्चालनमा आएको चिनियाँ समाचार संस्था सिन्ह्वाले जनाएकाे छ । यससँगै जाग्रेब उबर एपमार्फत स्वचालित ट्याक्सी बुक गर्न सकिने युरोपको पहिलो शहर बनेको छ ।

भर्नका सह–संस्थापक एवम् प्रमुख डिजाइन अधिकृत एड्रियानो मुद्रीकाले यो उपलब्धि वर्षाैँकाे निरन्तर प्रयास र प्राविधिक विकासबाट सम्भव भएको बताउनुभएको छ ।

स्वचालित ट्याक्सीको सुरक्षा सुनिश्चित गर्न हरसम्भव प्रयास भइरहेको छ । ती ट्याक्सीको ड्यासबोर्डमा जडान गरिएको ट्याब्लेटमार्फत शहरका चोक, ट्राफिक लाइट र पैदलयात्रीका बीचबाट कसरी मार्गनिर्देशन गरिरहेको छ भन्ने कुराको निरन्तर अनुगमन गरिन्छ ।

भर्नले चिनियाँ साझेदार पोनी एआईसँगको सहकार्यमा यो प्रविधि विकास गरेको हो । भविष्यमा थप सुविधायुक्त ट्याक्सी सञ्चालनमा ल्याउने योजना रहेको मुन्द्रीकाले बताउनुभएको छ ।

अहिले यो सेवा जाग्रेबको झन्डै १०० वर्ग किलोमिटर क्षेत्रमा उपलब्ध छ । प्रयोगकर्ताले भर्नको आफ्नै मोबाइल एप वा उबर एपमार्फत यो ‘रोबोट्याक्सी’ सेवा लिन सक्नेछन् ।

यो शुरुआतलाई युरोपको यातायात क्षेत्रमा एक महत्त्वपूर्ण कोशेढुङ्गाका रूपमा हेरिएको छ ।