बाजुराको बडीमालिकामा पूजा अर्चनाका लागि सरकारी टोली प्रस्थान

काठमाण्डौ — बाजुराको प्रसिद्ध धार्मिक तथा पर्यटकीय स्थल बडीमालिकामा पूजा अर्चनाका लागि सरकारी टोली प्रस्थान गरेको छ ।

बडीमालिका नगरपालिकाका प्रमुख अमरबहादुर खड्का र जिल्ला प्रहरी प्रमुख शैलेश्वरी बोहरासहितको टोलीलाई सदरमुकाम मार्तडीबाट बाजागाजा र सुरक्षाकर्मीको सलामीसहित आज बिदाइ गरिएको हो ।

टोली प्रस्थान गरेको अवसरमा नगरपालिकाले आज सार्वजनिक बिदासमेत दिएको छ ।

प्रहरी प्रमुखकै नेतृत्वमा टोली गएकाले यस वर्ष दर्शनार्थीको सुरक्षा व्यवस्था प्रभावकारी बनाइएको प्रमुख जिल्ला अधिकारी डोरेन्द्र निरौलाले बताउनुभयो । भदौ ११ गते हुने मुख्य पूजाका लागि सुदूरपश्चिम प्रदेश सरकारलगायत कैलाली, डोटी, जुम्ला र कालिकोटका सरकारी टोलीहरू पनि त्यसतर्फ लागिसकेका छन् ।

तीर्थयात्रीको सुविधालाई मध्यनजर गर्दै यस पटक नेपाल टेलिकमले ४ हजार २ सय मिटर उचाइमा रहेको बडीमालिका क्षेत्रमा ‘फोरजी’ सेवासमेत विस्तार गरिरहेको छ ।