त्रिशूली–३ ‘ए’ को टनेलभित्र फसेकाहरुको उद्धार प्रयास चल्दै

काठमाण्डौ – बाढीका कारण रसुवाको त्रिशूली–३ ‘ए’ जलविद्युत् आयोजनाको टनेलभित्र फसेका नागरिकको उद्धारका लागि निरन्तर प्रयास भइरहेको सरकारले जनाएको छ ।

अविरल वर्षा र अप्ठ्यारो परिस्थितिबीच पनि प्रभावित क्षेत्रमा नेपाली सेनासहितको उद्धार टोली रातभर खटिएर खोज तथा उद्धारको अथक प्रयास भैरहेको छ ।

प्राविधिक टोलीहरू आपत्कालीन उपकरण तथा प्राथमिक उपचार बाकससहित स्थलगत समन्वयमा जुटेका छन् । नेपाली सेनाका अनुसार सुरुङको प्रवेशद्वारमा थुप्रिएको बाढी, लेदो तथा भग्नावशेष पन्छाएर भित्र प्रवेश गर्नका लागि उद्धार टोलीले खन्ने र बाटो बनाउने काम तीव्र रूपमा भैरहेको छ ।

एक्साभेटर लगायतका विभिन्न उपकरण तथा औजारको प्रयोग गरी निरन्तर लेदो र भग्नावशेष पन्छाउने काम भइरहेको छ । आयोजनाको सुरुङभित्र ठूलो संख्यामा इन्जिनियर र मजदुर फसेको अनुमान गरिएको छ ।

अप्ठयारो भू–बनोटमा रहेको सुरुङमा फसेका व्यक्तिको उद्धार गर्न सरकारको आग्रहमा भारत र चीनबाट दक्ष उद्धारकर्मी हिजो नेपाल आएका थिए । उनीहरूको सहयोगमा नेपाली सुरक्षा फौजले त्यस क्षेत्रमा खोज तथा उद्धारलाई तीव्र बनाएको छ ।