भोटेकोशी बाढी : पाँचौं दिन पनि खोज र उद्धारको काम चल्दै

काठमाण्डौ – रसुवाको भोटेकोशी नदीमा गएको बुधबार आएको बाढीपछि प्रभावितको खोज र उद्धारको काम आज पाँचौं दिन पनि भैरहेको छ ।

बाढीपछि सम्पर्कविहीन भएकाहरुको खोज र  उद्धारको काम निरन्तर भैरहेको सरकारले जनाएको छ । जलविद्युत आयोजनाको सुरुङसँगै जंगल क्षेत्र र नदी किनारमा पनि खोजीको काम भैरहेको छ ।

प्रधानमन्त्री बालेन्द्र शाहले उद्धारका लागि हरेक दिन सुरक्षाकर्मीको संख्या बढाउँदै लगेको जानकारी दिनुभएको छ । उहाँले सामाजिक सञ्जालमार्फत दिएको जानकारीअनुसार थप हेलिकप्टरहरू तयारी अवस्थामा राखिएका छन्, तर भौगालिक अवस्था र प्रतिकूल मौसमका कारण एकैपटक धेरै उडान भर्न सकिएको छैन ।

खोज र उद्धारका लागि सुरक्षाकर्मीसँगै अन्तर्राष्ट्रिय समुदायको पनि सहयोग लिइरहेको उहाँले जानकारी दिनुभएको छ । भोटेकोशी र त्रिशूली नदीमा आएको बाढीपछि जलविद्युत आयोजनाको सुरुङ, जंगल र भिरपखेरामा आश्रय लिएर बसेकाहरु अझै उद्धारको पर्खाईमा छन् ।

परिवार तथा आफन्तहरूले स्याफ्रुबेँसी, लाङटाङ, चिलिमे तथा त्रिशूली जलविद्युत् आयोजनाका सुरुङभित्र आफ्ना मान्छे रहेको भन्दै जानकारी गराएका छन् । उद्धारको काम प्रभावकारी बन्न नसकेको परिवार तथा आफन्तहरुको गुनासो छ ।

कतिपय विस्थापितहरुले राहत पाउन नसकेको गुनासो पनि गरेका छन् । विकट क्षेत्रमा राहत पुग्न नसकेको भन्दै पालिकाका जनप्रतिनिधिले संघ सरकारको ध्यानाकर्षण गराएका छन् ।