बुढीगण्डकीको बाढीले आरूघाटको पुल पनि बगायो, बजार क्षेत्र खाली गरियो

काठमाण्डौ – गोरखाको चुमनुब्री गाउँपालिका भएर बग्ने बूढीगण्डकीको बाढीले आरूघाटको पुल पनि बगाएको छ ।

आज बिहान आएको बाढीले गोरखा र धादिङ जोड्ने आरूघाटको पुल बगाएको हो । आरूघाटका केही घरमा समेत बाढी पसेको छ । यसअघि बाडीले पैयू र बगर गाउँका ३५ घर बगाएको छ ।

दोभान, घट्टेखोला, जगत् र सल्लेरी गाउँमा व्यापक क्षति भएको छ । बूढीगण्डकी नदीमा आएको आकस्मिक बाढीपछि गोरखाको आरूघाट बजार खाली गराइएको छ ।

माथिल्लो क्षेत्रबाट लेदो र गेग्रानसहितको ठूलो बाढी आएसँगै जोखिम बढेपछि प्रशासनले आरूघाट बजारका बस्ती खाली गराइएको हो । त्यहाँका स्थानीयबासिन्दालाई सुरक्षित ठाउँमा सारिएको छ ।

आज बिहान गोरखाको चुमनुब्री गाउँपालिका–६ को लोक्पा र चुम्लिङकोबीचमा ठूलो पहिरो गएर बूढीगण्डकी थुनिएपछि लेदोसहित बाढी आएको हो ।