गृहमन्त्री गुरुङ नयाँ दिल्ली प्रस्थान

काठमाण्डाै – गृहमन्त्री सुधन गुरुङ बिमस्टेकको प्रथम गृहमन्त्रीस्तरीय बैठकमा सहभागी हुन आज भारतको नयाँ दिल्ली प्रस्थान गर्नुभएको छ । गृहमन्त्रीका रूपमा उहाँको यो पहिलो औपचारिक वैदेशिक भ्रमण हो ।

असोज २७ गते हुने बैठकमा नेपालसहित सातै सदस्य देशका आन्तरिक सुरक्षा मन्त्रीहरूको सहभागिता रहनेछ । बैठकमा लागूऔषध ओसारपसार, मानव बेचबिखन, साइबर अपराध र आतङ्कवादजस्ता अन्तरदेशीय सुरक्षा चासोका विषयमा छलफल हुने गृह मन्त्रालयले जनाएको छ ।

नेपालका तर्फबाट भने जलवायु परिवर्तनका कारण हिमाली क्षेत्रमा बढेको प्राकृतिक विपद् जोखिम न्यूनीकरण, पूर्वसूचना प्रणाली र एकीकृत उद्धारका लागि क्षेत्रीय सहकार्यलाई प्राथमिकता दिइनेछ ।

सन् २०१८ को काठमाण्डाै शिखर सम्मेलनले परिकल्पना गरेको सुरक्षा क्षेत्रको यो उच्चस्तरीय बैठक पहिलो पटक आयोजना हुन लागेको हो ।

भ्रमणका क्रममा गृहमन्त्री गुरुङले आफ्ना समकक्षीसँग द्विपक्षीय वार्ता गरी असोज २८ गते स्वदेश फर्कनुहुनेछ ।