भोटेकोशी बाढीबाट प्रभावित १ हजार ५० जना अझै होल्डिङ सेन्टरमा

काठमाण्डाै – गएकाे भदौ १० गते रसुवाको भोटेकोशी नदीमा आएको बाढीबाट प्रभावित १ हजार ५० जना अझै होल्डिङ सेन्टरमा रहेका सरकारले जनाएको छ ।

सिंहदरबारमा आज बसेको भोटेकोशी एवम् कालीगण्डकी करिडोर विपद्सम्बन्धी अध्ययन तथा अनुगमन संसदीय विशेष समितिको बैठकमा गृह मन्त्रालयका सचिव केदारनाथ शर्माले यसबारे जानकारी दिनुभएको हो ।

प्रभावित धेरैजसो नागरिक भाडाको घरमा सरेपछि होल्डिङ सेन्टरको सङ्ख्या ३७ बाट घटाएर १७ मा झरेको पनि गृहसचिव शर्माले बताउनुभयाे ।

यस्तै बैठकमा राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख डा. धर्मराज उप्रेतीले बाढीमा परेर बेपत्ता भएका नागरिकलाई मृत घोषणा गरी मृत्यु प्रमाणपत्र उपलब्ध गराउने प्रक्रिया पनि अन्तिम चरणमा पुगेको जानकारी गराउनुभयो ।

असोज २५ गते बूढीगण्डकी नदीमा आएको बाढीबाट प्रभावित चार पालिकालाई पनि सङ्कटग्रस्त क्षेत्र घोषणा गर्ने र घरभाडाको व्यवस्था गर्ने विषयमा प्राधिकरणमा छलफल भइरहेको उहाँको भनाइ छ ।

यस्तै भोटेकोशी बाढीमा परेर ज्यान गुमाएका व्यक्तिका परिवारलाई प्रतिव्यक्ति दुई लाख रुपैयाँ राहत दिने व्यवस्था कार्यान्वयनको चरणमा रहेको सरकारको भनाइ छ ।

प्रभावितको पुनर्स्थापना, अस्थायी आवासको व्यवस्था, बेपत्ता नागरिकको मृत्यु प्रमाणीकरण तथा राहत वितरणलाई व्यवस्थित रूपमा अघि बढाउने काम भइरहेको गृहसचिव शर्माको भनाइ छ ।