दशैँ मनाउन एक हप्तामै झण्डै साढे ४ लाख यात्रु बाहिरिए, आजदेखि थप बढ्ने

काठमाण्डौ – दशैँ मनाउन काठमाण्डौ उपत्यकाबाट एक हप्तामा झण्डै साढे ४ लाख यात्रु बाहिरिएका छन् । घटस्थापनायता आज बिहानसम्म ४ लाख ४० हजार भन्दा धेरैको संख्यामा यात्रु बाहिरिएका हुन् ।

काठमाण्डौ उपत्यका ट्राफिक प्रहरी कार्यालयका अनुसार काठमाण्डौबाट बाहिरिने र भित्रने सबै नाकामा चाप बढेको छ । आज फूलपातीदेखि सरकारी कार्यालय, विद्यालयसँगै अरु विभिन्न निकायमा पनि बिदा भएकाले विभिन्न पेशा र व्यवसायमा संलग्नहरु आ–आफ्नो घर फर्कने क्रम अझ बढ्नेछ ।

यसपाली ९ दिन लामो बिदा छ । ८ गते आइतबार समेत बिदा हुने भएकाले सरकारी कार्यालय अब पुर्णिमाको दिन कात्तिक ९ गतेदेखि मात्रै खुल्नेछन् ।

दशैँका लागि यस वर्ष झण्डै १० लाख यात्रु बाहिरिने अनुमान छ । मौसम पनि घमाइलो हुँदै गएको छ ।

सडकमा कुनै अवरोध नभए पनि यसअघिको बाढी÷पहिरोले बिग्रिएका ठाउँ, खाल्डाखुल्डीलगायतले समस्या भएको यात्रुको गुनासो छ ।