गाजाका ५ लाख प्यालेस्टिनीले खाद्य सहयोग गुमाउने

विश्व खाद्य कार्यक्रम (डब्ल्यूएफपी) ले कोषको अभावका कारण गाजामा सञ्चालित आफ्ना राहत कार्यक्रमहरूमा ठूलो कटौती गरेको छ ।

डब्ल्यूएफपीले मासिक सहायता प्राप्त गर्ने मानिसहरूको सङ्ख्या १६ लाखबाट घटाएर ११ लाखमा झार्ने घाेषणा गरेकाे समाचार संस्था अलजजीराले जनाएकाे छ ।

प्रतिपरिवार दुई वटा खाद्य सामग्रीका प्याकेज उपलब्ध गराइँदै आएकोमा अब एउटा मात्र दिइनेछ र पिठोका बोराहरूको आकार पनि सानो हुनेछ ।

डब्ल्यूएफपीले आफूले उपलब्ध गराउँदै आएको तातो खानाको सङ्ख्या पनि दैनिक २ लाख ५० हजारबाट घटाएर १ लाख ५० हजारमा झार्ने जनाएको खबरमा उल्लेख छ ।

युद्धग्रस्त प्यालेस्टिनी क्षेत्रका धेरैजसो मानिसहरू पर्याप्त खाना जुटाउन सङ्घर्ष गरिरहेका छन् ।

संयुक्त राष्ट्रसङ्घको निकाय डब्ल्यूएफपीले सन् २०२६ मा प्यालेस्टाइनसम्बन्धी आफ्ना गतिविधिहरूका लागि अघिल्ला वर्षहरूको तुलनामा आधाभन्दा कम रकम प्राप्त भएको जनाएको छ ।

डब्ल्यूएफपीले आउँदो ६ महिनासम्म प्यालेस्टिनी भूभागमा अत्यावश्यक कार्यहरू सञ्चालन गरिरहन थप ४५ करोड अमेरिकी डलर अर्थात् साढे ६८ अर्ब रुपैयाँभन्दा धेरै रकम तत्काल आवश्यक रहेको बताएको छ ।

सन् २०२३ को अक्टोबर ७ मा हमासको नेतृत्वमा इजरायलमाथि आक्रमण भएको थियो । त्यसको जवाफमा इजरायलले शुरू गरेको युद्धका कारण त्यहाँको शिक्षा, स्वास्थ्य सेवा र अर्थतन्त्रलाई ध्वस्त पारेको छ । साथै खाना, पानी, आश्रय र अन्य आधारभूत आवश्यकताहरू जुटाउनु त्यहाँका मानिसहरूका लागि दैनिक सङ्घर्षको विषय बनेको छ ।

गाजाको स्वास्थ्य मन्त्रालयका अनुसार इजरायलले आक्रमण शुरू गरेयता ७४ हजार २०० भन्दा धेरै प्यालेस्टिनी मारिएका छन् ।