धेरै ठाउँमा मौसम सफा : भोलि दशैँको टीकाको दिन पनि घमाइलो नै रहने

काठमाण्डौ – दशैँको महानवमीका दिन आज देशका धेरै ठाउँमा मौसम सफा छ । आज तराईमा बिहानपख केही ठाउँमा हुस्सु/कुहिरो लागेपनि बिस्तारै हट्ने र दिनभर मौसम मुख्यतया सफा रहने मौसम पूर्वानुमान महाशाखाले जनाएको छ ।

त्यस्तै हिमाली र पहाडी भागमा बिहान आंशिक बादल लागेको छ । आज कोशी, बागमती र गण्डकी प्रदेशका हिमाली र पहाडी एक/दुई ठाउँमा मेघगर्जन/चट्याङ्गसहित हल्का वर्षा र हिमपातको सम्भावना रहेको महाशाखाले जनाएको छ ।

मौसमविद्काअनुसार आज जस्तै भोलि दशैँको टीकाको मुख्य दिन पनि देशका धेरै ठाउँमा मौसम सफा रहनेछ । यसअघि महाशाखाले विशेष बुलेटिनमार्फत् पनि दशैँको मुख्य दिन मौसम घमाइलो हुने जनाएको थियो ।

भोलि कोशी, बागमती र गण्डकी प्रदेशका हिमाली तथा पहाडी भूभागसँगै कर्णाली र सुदूरपश्चिम प्रदेशका हिमाली भूभागमा आंशिक बदली रहने पूर्वानुमान छ । देशका बाँकी भागमा मौसम मुख्यतः सफा रहनेछ ।

हिमाली तथा पहाडी भागका एक/दुई ठाउँमा हल्का वर्षा वा हिमपातको सम्भावना रहेको महाशाखाले जनाएको छ ।