दशैँको रौनकसँगै धान भित्र्याउन किसानलाई चटारो (फोटो फिचर)

काठमाण्डौ - बडादशैँको रौनक छाइरहेका बेला गुल्मीको रूरू गाउँपालिका–४ घ्यूबेँशीका किसानलाई भने पाकेको धान भित्र्याउने चटारो छ । चाडपर्व नजिकिएसँगै खेतमा पहेँलपुर भएर झुलेको धान काट्न स्थानीय किसान बिहानैदेखि खेतमा खटिएका छन् । 

असोज महिनामा लगातार परेको झरीका कारण यस वर्ष धान उत्पादन घट्ने हो कि भन्ने चिन्ताले किसानलाई सताएको छ। स्थानीय किसान परशुराम ज्ञवाली पनि प्रतिकूल मौसमका कारण धान उत्पादनमा असर पर्ने हो कि भन्ने चिन्तामा हुनुहुन्छ।

असामयिक वर्षाले खेतमा पाकिसकेको धानमा क्षति पुर्‍याएपछि घाम लाग्ने बित्तिकै किसानहरू धान काट्ने, दाइँ हाल्ने र भित्र्याउने काममा जुटेका हुन् । दशैँको तयारीसँगै बाली भित्र्याउनुपर्ने भएकाले किसानलाई यतिबेला धानबाली भित्र्याउन भ्याइनभ्याइ भएको छ ।