गण्डकीमा सघन उपचारका लागि २५ शय्या थप

काठमाण्डौ - पोखरा स्वास्थ्य विज्ञान प्रतिष्ठान अन्तर्गतको पश्चिमाञ्चल क्षेत्रीय अस्पतालमा २५ शय्याको नयाँ सघन उपचार कक्ष सञ्चालनमा आएको छ ।

यससँगै अस्पतालमा सघन उपचारका लागि उपलब्ध शय्या सङ्ख्या ३५ पुगेको छ । नयाँ कक्षमा १६ शय्याको सघन उपचार कक्ष, आठ शय्याको कोरोनरी केयर युनिट र एक शय्याको आइसोलेसन आईसीयू रहेको प्रतिष्ठानका निर्देशक डा. झपिन्द्र पोखरेलले जानकारी दिनुभयो । यसअघि अस्पतालमा १० शय्याको आईसीयू सञ्चालनमा थियो ।

प्रतिष्ठानले एक करोड रुपैयाँ लगानी थपेर नयाँ कक्ष सञ्चालनमा ल्याएको हो । गण्डकी प्रदेशको सुविधा सम्पन्न यो सरकारी अस्पतालमा ११ वटै जिल्लाका साथै अन्य जिल्लाबाट पनि बिरामी आउने गरेका छन् । यो अस्पतालले दैनिक दुई हजार बिरामीमा सेवा प्रवाह गरिरहेको छ ।