काठमाण्डौ उपत्यकामा सार्वजनिक गाडी नचल्दा यात्रुलाई समस्या

काठमाण्डौ - दशैँमा मान्यजनबाट रातो टीका, पहेँलो जमरा र आशीर्वाद ग्रहण गर्ने क्रम शुरु भएसँगै काठमाण्डौ उपत्यकाका सडकमा सर्वसाधारणको चहलपहल बढेको छ । घटस्थापनादेखि सुनसान प्रायः बनेका राजधानीका मुख्य सडक तथा चोकहरूमा विजयादशमीको टीका शुरु भएसँगै आवागमन बाक्लिएको हो ।

बिहान घरघरमा कुलदेवताको पूजा आराधना गरी टीका लगाएपछि सर्वसाधारण आफन्त तथा नातागोताका घरमा टीका र आशीर्वाद थाप्न निस्किएका छन् । यसले बिहानको तुलनामा दिउँसो उपत्यकाका सडकमा चहलपहल बढाएको छ । 

दशैँ मनाउन ठूलो संख्यामा नागरिक उपत्यकाबाट गाउँघर फर्किएपछि केही दिनयता राजधानीका सडक सुनसानजस्तै बनेका थिए । तर, विजयादशमीको दिन टीका लगाउन आफन्तकहाँ जानेहरूको संख्या बढेसँगै चक्रपथसहित उपत्यकाका भित्री सडकमा समेत निजी तथा सार्वजनिक सवारीसाधनको केही चाप बढेको छ । 

कोटेश्वर, नयाँ बानेश्वर, कलङ्की, चाबहिल र महाराजगञ्जलगायतका प्रमुख चोकमा दशैँका नयाँ पहिरनमा सजिएका सर्वसाधारणको बाक्लो उपस्थिति देखिएको छ । दशैँको मुख्य दिन सार्वजनिक गाडी कम मात्रै चल्दा सर्वसाधारणलाई आवत जावतमा केही समस्या भएको छ । सार्वजनिक यातायातको विकल्पमा ट्याक्सी, निजी कार र मोटरसाइकलको प्रयोग बढेको छ । 

यसैबीच, काठमाण्डौ उपत्यका ट्राफिक प्रहरी कार्यालयले चाडपर्वका बेला हुनसक्ने सवारी दुर्घटना न्यूनीकरण तथा आवागमनलाई सहज बनाउन विभिन्न रणनीतिक स्थानमा ट्राफिक प्रहरी परिचालन र जाँचलाई तीव्रता दिएको जनाएको छ । 

विजयादशमीका दिन सुरु हुने टीका तथा आशीर्वाद ग्रहणको क्रम कोजाग्रत पूर्णिमासम्म चल्ने धार्मिक तथा सांस्कृतिक परम्परा छ । टाढा रहेका मान्यजन तथा आफन्तकहाँ पुगेर टीका र आशीर्वाद लिने चलन रहेकाले आगामी दिनमा पनि उपत्यकाभित्र र जिल्लाहरूबीचको आवागमन बढ्ने अपेक्षा छ ।