दिल्लीबाट एक हप्ताअघि पक्राउ परेका सीजेपीका दुई नेता रिहा

भारतको दिल्लीमा एक हप्ता अघि भएको प्रदर्शनकाक्रममा पक्राउ परेका ‘कक्रोच जनता पार्टी’ (सीजेपी) का दुई नेता रिहा हुनुभएको छ ।

मुख्य निर्वाचन आयुक्त ज्ञानेशकुमारको राजीनामा माग्दै प्रदर्शन गरेका सीजेपी प्रमुख प्रवक्ता सौरभ दास र सहसंयोजक आशुतोष रांका हिजो जेलमुक्त हुनुभएको हो ।

उहाँहरुलाई दिल्लीको जन्तर मन्तरमा निषेधित प्रदर्शनस्थलमा प्रवेश गरेको आरोपमा प्रहरीले पक्राउ गरी जेलमा राखेको थियो । विशेष कार्यकारी मजिस्ट्रेटको अदालतले रिहाइको आदेश दिएपछि सौरभ र आशुतोष तिहाड जेलबाट छुट्नुभएको छ ।

उहाँहरुले आफूहरूले कुनै गलत काम नगरेको प्रतिक्रिया दिनुभएको बीबीसी हिन्दीले जनाएको छ । भारतको निर्वाचन आयोगले सत्तारूढ दललाई फाइदा पुग्ने गरी मतदाता सूचीमा हेरफेर गरेको आरोप लगाउँदै सीजेपी समर्थकहरुले  मुख्य निर्वाचन आयुक्तको राजीनामा मागिरहेका छन् ।

तर, निर्वाचन आयोगले भने यो आरोप अस्वीकार गर्दै आएको छ । ‘कक्रोच जनता पार्टी’ सन् २०२६ को मे महिनामा इन्टरनेटमा शुरु भएको एउटा व्यङ्ग्यात्मक अभियानबाट विकसित भएको हो ।

भारतका प्रधानन्यायाधीशले बेरोजगार युवाहरूलाई ‘कक्रोच’ अर्थात् साङ्लासँग तुलना गरेपछि यसको शुरुआत भएको थियो ।