टर्कीएमा हुने जल वायु सम्मेलनका लागि नेपालको तयारी तीव्र

काठमाण्डौ - नेपालले संयुक्त राष्ट्रसङ्घीय जलवायु परिवर्तनसम्बन्धी सम्मेलन कोप–३१ का लागि आन्तरिक तयारी तीव्र पारेको छ ।

आउँदो कात्तिक २३ गतेदेखि मङ्सिर ४ गतेसम्म टर्कीएको अन्टाल्यामा हुने सम्मेलनमा नेपालले जलवायु न्याय, पर्वतीय क्षेत्रका जोखिम, जलवायुजन्य क्षति तथा नोक्सानी र जलवायु वित्तमा सहज पहुँचको विषयलाई प्राथमिकताका साथ उठाउने तयारी गरेको हो । कृषि, वन तथा पर्यावरण मन्त्रालयका अनुसार सम्मेलनमा प्रस्तुत गरिने नेपालको राष्ट्रिय स्थिति पत्र अन्तिम चरणमा पुगेको छ ।

सरोकारवाला निकायसँग छलफल गरी सुझाव सङ्कलन भइरहेको र आउँदो हप्ता स्थिति पत्र सार्वजनिक गर्ने तयारी छ । जलवायु व्यवस्थापन महाशाखाका प्रमुख एवं सहसचिव डा. महेश्वर ढकालले नेपालको प्राथमिकता प्रभावकारी रूपमा प्रस्तुत गर्न उच्चस्तरीय राजनीतिक प्रतिनिधित्व आवश्यक रहेको बताउनुभएको छ ।

उहाँका अनुसार सम्मेलनको पहिलो साता प्राविधिक वार्ता हुनेछ भने दोस्रो साता जलवायु वित्त र अनुकूलनलगायत विषयमा मन्त्रिस्तरिय छलफल हुनेछ । यस पटकको सम्मेलनमा नेपालले पर्वतीय क्षेत्रका विशिष्ट जलवायु जोखिम, हिमतालको निगरानी, बाढी पहिरोबाट हुने क्षति र प्रभावित समुदायको सुरक्षालाई प्राथमिकताका साथ उठाउनुपर्ने विज्ञहरूले सुझाव दिएका छन् ।

विशेष गरी भोटेकोशी क्षेत्रमा भएको बाढीलगायत पछिल्ला जलवायुजन्य विपद्बाट नेपालमा परेको असरलाई अन्तर्राष्ट्रिय समुदायसमक्ष प्रस्तुत गरी आर्थिक तथा प्राविधिक सहयोग जुटाउनुपर्नेमा विज्ञहरूले जोड दिएका छन् । जलवायु विज्ञहरूले विकसित देशलाई जलवायु परिवर्तनको असर न्यूनीकरण र अनुकूलनका लागि लगानी बढाउन दबाब दिनुपर्ने बताएका छन् ।

नेपालले आफ्ना पर्वतीय क्षेत्रका जोखिम, जलवायु अनुकूलनका आवश्यकता र जलवायुजन्य विपद्बाट भएको क्षतिको विषयलाई वैज्ञानिक प्रमाणसहित अन्तर्राष्ट्रिय मञ्चमा उठाउने तयारी गरेको छ ।