म्याग्दीका पशुगोठ बेँसी झर्न थाले

काठमाण्डौ – म्याग्दीमा चिसो बढेसँगै पशुपालकहरुले पशुगोठ बेँसीतर्फ झार्न थालेका छन् ।

हिमाली क्षेत्रको बुकीमा लगिएका गाईभैँसी र भेँडाबाख्राका गोठ चिसो बढ्न थालेसँगै किसानहरूले गाउँ नजिकका खर्कमा झार्न थालेका हुन् ।

धौलागिरि गाउँपालिका–१ गुर्जाका किसान हर्कवीर विकका अनुसार बर्खायामका तीन महिना उच्च हिमाली चरन क्षेत्रमा पशु चौपाया चराएपछि अहिले गाउँ नजिकै गोठ ल्याइएको छ ।

पोषिलो घाँस खाएर सप्रिएका पशुचौपाया र बन्दोबस्तीका सामानसहित गोठालाहरू गाउँ फर्किएपछि स्थानीय बस्तीहरूमा चहलपहल बढेको छ । धौलागिरि, अन्नपूर्ण र ढोरपाटन शिकार आरक्ष आसपासका किसानहरूले परम्परागत घुम्ती गोठ प्रणालीबाट पशुपालन गर्दै आएका छन् ।

यसरी खेतबारीमा गोठ राख्दा जमिन मलिलो हुने गर्दछ । तर, पछिल्लो समय युवा पुस्ताको बेवास्ता र वैदेशिक रोजगारीका कारण यो परम्परागत पशुपालन पेसा भने सङ्कटमा पर्न थालेको छ ।