चितवनको कुरिनटारमा तीन वटा गाडी ठोक्किए, ११ जना घाइते

काठमाण्डौ – पृथ्वी राजमार्गअन्तर्गत चितवनको कुरिनटारमा तीन वटा गाडी ठोक्किएर भएको दुर्घटनामा ११ जना घाइते भएका छन् ।

इच्छाकामना गाउँपालिका–४ धारापानीमा ट्रक, बस र माइक्रो बस एक–आपसमा ठोक्किएर दुर्घटना भएको हो ।

सर्लाहीबाट काठमाण्डौका लागि छुटेको बाग्मती प्रदेश ०३–००१ ख २७७७ नम्बरको बस, काठमाण्डौबाट मुग्लिनका लागि छुटेको प्रदेश १–०२–००२ ख ०६१६ नम्बरको ट्रक र बुटवलबाट काठमाण्डौका लागि छुटेको बाग्मती प्रदेश ०३–००१ ज १२५९ नम्बरको माइक्रो बस एक आपसमा ठोक्किएर दुर्घटना हुँदा ११ जना घाइते भएका सशस्त्र प्रहरी बलका सहप्रवक्ता डीएसपी शैलेन्द्र थापाले जानकारी दिनुभयो ।

सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट ६६ जनाको टोली दुर्घटनास्थलमा खटिएको छ । अहिले कुरिनटार क्षेत्रमा सडक पूर्णरुपमा अवरुद्ध छ ।

घाइतेलाई स्थानीय अस्पताल र कुरिनटारमा रहेको सशस्त्र प्रहरी बलको ट्रमा सेन्टरमा लगिएको छ ।