‘अपरेशन सिन्दूर’ पछि पहिलो पटक भारतले पठायाे पाकिस्तानलाई निम्तो

भारतले पाकिस्तानलाई शाङ्घाई सहयोग सङ्गठन (एससीओ) को पहिलो ‘सिभिलाइजेशन डायलग फोरम’ मा सहभागी हुन आमन्त्रण गरेको छ ।

यो कार्यक्रम आउँदो नोभेम्बर २० देखि २२ सम्म नयाँ दिल्लीमा आयोजना हुने तय भएको छ । ‘अपरेशन सिन्दूर’ को झन्डै १८ महिनापछि दुई छिमेकी देशबीच सम्बन्ध तनावपूर्ण बनेकै बेला भारतले पाकिस्तानलाई निम्तो दिएको हो ।

भारतले पाकिस्तानका राष्ट्रिय सम्पदा तथा संस्कृति मन्त्री औरङ्गजेब खान खिचीलाई तीन दिने कार्यक्रममा इस्लामाबादको प्रतिनिधिमण्डलको नेतृत्व गर्न आमन्त्रित गरेको समाचार संस्था एएनआईले जनाएको छ । यद्यपि मन्त्री स्वयम् उपस्थित हुने वा अन्य प्रतिनिधिलाई पठाउने भन्नेबारे पाकिस्तानले अहिलेसम्म पुष्टि गरेको छैन ।

भारतको विदेश मन्त्रालय र संस्कृति मन्त्रालयले संयुक्त रूपमा आयोजना गर्ने कार्यक्रमको उद्देश्य एससीओका १० सदस्य देशबीच सांस्कृतिक आदानप्रदानलाई प्रवर्द्धन गर्नु, साझा सम्पदाको संरक्षण गर्नु र जनस्तरको सम्बन्धलाई सुदृढ पार्नु रहेको खबरमा उल्लेख छ ।

भारतीय अधिकारीहरूले यो निमन्त्रणा एससीओ कार्यक्रमको आयोजकका रूपमा भारतको जिम्मेवारीको हिस्सा हो र यसलाई पाकिस्तानप्रतिको द्विपक्षीय अडानमा आएको परिवर्तनका रूपमा अर्थ लगाउन नहुने बताएका छन् ।

एक वरिष्ठ सरकारी अधिकारीका अनुसार यस मञ्चमा सबै १० सदस्य राष्ट्रलाई आमन्त्रित गरिएको छ ।

एससीओ सदस्य देशमा भारत, पाकिस्तानसहित चीन, रुस, इरान, काजकिस्तान, किर्गिस्तान, ताजकिस्तान, उज्वेकिस्तान र बेलारुस रहेका छन् ।

‘अपरेशन सिन्दूर’ भारतले सन् २०२५ को मे महिनामा पाकिस्तान र पाकिस्तान प्रशासित कश्मीरमाथि सञ्चालन गरेको चार दिने सैन्य कारबाही हो ।

त्यही वर्षको अप्रिल २२ मा पहलगाममा भएको आतङ्कवादी आक्रमणका २६ भारतीय र १ नेपाली नागरिकको ज्यान गएको थियो । यही घटनाको प्रतिशोधस्वरूप भारतले यो सैन्य अभियान सञ्चालन गरेको हो ।