नेपाली कांग्रेसका नेता डिगबहादुर लिम्बूको जन्म २०२० साल भदौ २२ गते सिंहदेवीमा भएको हो । उहाँ हंसानुमा लिम्बू र प्रेमबहादुर लिम्बूका छोरा हुनुहुन्छ । लिम्बू वाम राजनीति छोडेर कांग्रेसमा होमिनुभएको हो ।
२०३६ सालमा तत्कालीन नेकपा मालेको विद्यार्थी संगठन अनेरास्ववियुबाट राजनीति थालेका लिम्बू त्यसको ६ वर्षपछि २०४३ सालमा नेपाली कांग्रेसमा प्रवेश गर्नुभएको थियो । शान्ति भगवती उच्चमावि लेटाङबाट एसएलसी गरेका लिम्बूले रिचमण्ड एकेडेमी काठमाण्डौबाट आइए र त्रिभुवन विश्वविद्यालयबाट बिए अध्ययन गर्नुभएको छ ।
बहुदलवादी पार्टीबाट २०३३ सालमा राजनीतिमा लागेका डिगबहादुरले २०४२ सालमा कांग्रेसको सदस्यता लिनु भएको थियो । उहाँ २०४७ सालमा नेपाल शिक्षक संघ मोरङको संस्थापक सदस्य, २०५२ देखि २०५८ सालसम्म कांग्रेसको क्षेत्रीय सभापति हुनुभएको थियो । कांग्रेस पार्टी फुटेपछि २०६२ सालदेखि २०६७ सालसम्म प्रजातान्त्रिक कांग्रेसको मोरङ सभापति भएका लिम्बू पार्टी एकीकरणपछि सहसभापति हुनु भएको थियो ।
२०६१ सालमा सामुदायिक वन उपभोक्ता महासंघ मोरङको जिल्ला अध्यक्ष भएका लिम्बू २०५७ देखि २०६५ सालसम्म शान्ति भगवती उमावि व्यवस्थापन समितिको अध्यक्ष र २०६४ सालदेखि २०६८ सालसम्म लेटाङ बहुमुखी क्याम्पसको अध्यक्ष भएर काम गर्नुभयो ।
२०६४ सालको चुनावमा मोरङ क्षेत्र नं १ बाट पराजित डिकबहादुर २०७० सालको चुनावमा भने विजयी हुनु भएको थियो । २०७४ सालको चुनावमा उहाँ त्यसै क्षेत्रबाट पराजित हुनु भएको हो ।
२०७२ साल माघ २६ गते उहाँ नेपाली कांग्रेसको जिल्ला सभापतिमा निर्वाचित हुनुभएको थियो ।
