एमाले नेता विशाल भट्टराईको जन्म २०२५ साल चैत्र २२ गते खोटाङबजार – ६ मा भएको हो । भट्टराईले स्नातक तहसम्मको अध्ययन गर्नुभएको छ ।
२०३८ सालमा खोटाङको भगवती माविमा अखिलको सदस्य भएर उहाँले राजनीति सुरु गर्नुभएको हो । उहाँ रत्नराज्य र महेन्द्ररत्न क्याम्पसको स्ववियु सभापति हुनुभएको थियो । भट्टराईले अनेरास्ववियुको केन्द्रीय प्रचार प्रमुख भएर पनि काम गर्नुभएको थियो । उहाँ नेकपा एमाले जिल्ला कमिटि सदस्य, उपसचिव, सचिव, अध्यक्ष हुँदै पोलिटब्युरो सदस्य हुनुहुन्छ । उहाँ तत्कालीन विद्रोही नेकपा माओवादीद्वारा ४६ दिन अपहरणमा समेत पर्नुभएको थियो ।
२०५६ सालको प्रतिनिधिसभाको चुनावमा नेपाली कांग्रेसका शिवकुमार बस्नेतसँग खोटाङ क्षेत्र नम्बर २ मा पराजित भट्टराई २०६४ सालमा भएको संविधानसभा चुनावमा तत्कालीन माओवादीका उम्मेदवार समिता कार्कीसँग पराजित हुनुभयो । २०७० सालको दोस्रो संविधानसभाको चुनावमा भने उहाँ त्यही क्षेत्रबाट विजयी हुनुभयो । २०७४ को चुनावमा क्षेत्र नम्बर १ बाट विजयी हुनुभएको भट्टराई एमाले संसदीय दलको प्रमुख सचेतकसमेत हुनुहुन्थ्यो ।
