नेकपा एमालेका सचिव गोकर्णराज बिष्टको जन्म विसं २०२२ साल असार १७ गते गुल्मी जिल्लाको दोहली गाविस ३ मा भएको हो । भीमबहादुर बिष्ट र चिन्तकला बिष्टका छोरा गोकर्णराज बिष्टले २०३५ सालदेखि राजनीति सुरु गर्नुभएको हो ।
२०४० सालमा लोकसेवा आयोगमा नाम निकालेका बिष्ट तत्कालीन अञ्चलाधीश काजीमान कन्दङ्वासँग जागिरको पहिलो दिन नै विवाद परेपछि सरकारी जागिर छोडेर राजनीतिमा सक्रिय भएर लाग्नुभएको थियो ।
२०४३ सालमा पार्टी सदस्यता लिएका बिष्ट अनेरास्ववियूको काठमाण्डौ र वाग्मती अञ्चल अध्यक्ष, केन्द्रीय समितिमा संगठन विभाग, शैक्षिक विभाग, रचनात्मक विभाग, प्रचार प्रसार विभाग प्रमुख भएर काम गर्नुभयो ।
उहाँ २०५० सालमा तत्कालीन प्रजातान्त्रिक राष्ट्रिय युवा संघ (हालको युवा संघ नेपाल) को केन्द्रीय कमिटीमा रहेर काम गर्नुभयो । ०५३ मा प्ररायूसंघको महासचिव बनेका बिष्ट २०५७ देखि दुई कार्यकाल त्यसको अध्यक्ष हुनुभयो ।
नेकपा एमालेको केन्द्रीय सदस्य, पार्टीको बुद्धिजीवि परिषदको इन्चार्जसमेत भइसक्नु भएका विष्ट अहिले भने सचिव हुनुहुन्छ । बिष्टले पार्टीको स्थानीय विभाग, विद्यार्थी र युवा फाँटको इञ्चार्ज भएर समेत काम नेकपा एमालेका केन्द्रीय सदस्य बनेर काम गर्नुभयो । जलश्रोत तथा श्रममन्त्रीसमेत भएका बिष्टले २०७४ सालको चुनावमा गुल्मी क्षेत्र नम्बर २ बाट विजयी हुनु भएको हो ।
