Ujyaalo Online

देश परदेश (अडियाे)

खाडीका कुवेत र कतार हुन् वा पूर्वी एसियाका कोरिया र मलेसिया ! अथवा युरोप र अमेरिकाका देश नै किन नहुन्, अब धरतीका सातै महादेशमा नेपाली नपुगेका देश छैनन् । विदेशमा नेपालीले नगरेका काम पनि अब थोरै मात्र छन् । वैदेशिक रोजगारी, अध्ययन, अनुसन्धान, ब्यवसाय र जागीरका सिलसिलामा विदेशमा रहेका नेपालीको संख्या झण्डै ५० लाख पुगेको छ । त्यसमध्ये आधाभन्दा बढी जनशक्ति वैदेशिक रोजगारीका सिलसिलामा विदेश पुगेको छ । देश परदेश वैदेशिक रोजगारीमा जाने र गएका नेपालीलाई सुरक्षित, व्यवस्थित र मर्यादित वनाउने मल्टिमिडिया प्लेटफर्म हो । यो प्लेटफर्ममा रेडियो र अनलाईन एकअर्कासित अन्तरंग जोडिएका छन् । विदेश जान चाहने नेपाली र विदेशमा रहेका नेपालीका भावना, भोगाई, चासो र सरोकारका बिषय र घटनाहरु यो प्लेटफर्मका मुख्य बिषयबस्तु हुन् । यिनै बिषयमा हरेक मंगलवार बिहान ८ः२० देखि ९ः०० बजेसम्म देशभरिका सयभन्दा धेरै स्टेशनबाट रेडियो कार्यक्रम देश परदेश प्रसारण हुन्छ । विदेशमा काम गर्न जाने र विदेशमा काम गरिरहेका नेपालीका काम, सीप र कमाईसँग सम्बन्धित अनुभव, कथाव्यथा, जानकारी, प्रश्न उत्तर र समाचार तथा टिप्पणीहरु सँगै रेडियो कार्यक्रम समेत अनलाईन पोर्टलमा समेटिन्छन् । उज्यालोको देश परदेश मल्टिमिडिया प्लेटफर्म तपाईंको साथ र सहयोगमा वैदेशिक रोजगारलाई सुरक्षित, व्यवस्थित र मर्यादित वनाउने अभियान हो । हामी तपाईंलाई आफ्ना अनुभव, सीप, कमाई, सफलता र विफलताका कथा, समाचार, टिप्पणी तथा तपाईंका भोगाई लेखेर, बोलेर र भिडियोमा पठाएर यो अभियानमा साथ दिन र सहयोग गर्न अनुरोध गर्छौ । देश परदेश मल्टिमिडिया प्लेटफर्ममा तपाईंलाई हार्दिक स्वागत छ ! 

423 Desh Paradesh 2020-08-04

कार्यक्रम देश परदेशको ४२३ औं अंक खाडी र मलेसियामा महिनौंपछि काममा फर्किएका नेपाली श्रमिकका अनुभवसँगै काममा जाँदा के कसरी सुरक्षित हुन सकिन्छ त भन्ने विषयमा केन्द्रित छ । कार्यक्रममा महिनौंपछि खाडी र मलेसियामा काममा फर्किएका नेपाली श्रमिकका अनुभव सुन्न सकिन्छ । खाडीका देश र मलेसियामा कार्यरत नेपाली श्रमिकको रोजगारीको अवस्था के छ त ? कस्ता क्षेत्रमा कार्यरत नेपालीको रोजगारी गुम्यो र कस्ता क्षेत्रमा फेरि काम सुरु भएको छ त ? भन्ने विषयमा जानकारी  समावेश गरिएको छ । अनि, कोरोनाबाट बच्दै सुरक्षित भएर काम गर्ने उपयाबारे गैरआवसीय नेपाली संघ एनआरएनएको स्वास्थ्य समितिका संयोजक डा. सञ्जिव सापकोटासँग गरिएको कुराकानी पनि सुन्न सकिन्छ । साथमा छन् तपाईँले सोधेका प्रश्नमा हामीले खोजेको उत्तर र तपाईँका रुची र चासो समेटिएको गतिविधि पनि ।