रुकुम पश्चिम – रुकुम पश्चिमको चौरजहारी नगरपालिका ८ सोतीमा गएको जेठ १० गते शनिबार भएको घटनामा बेपत्ता भएका अर्का एक जनाकाे शव भेटिएकाे छ । याेसँगै बेपत्ता भएका ६ जनाकै शव भेटिएकाे हाे ।  

बेपत्ता भएका भेरी नगरपालिका ११ का गोविन्द शाहीको शव मङ्गलबार दिउँसो भेटिएकाे हाे । शाहीको शव जाजरकोटको भेरी नगरपालिका १२ को खोदा खोलानजिक भेटिएको उनका आफन्तले बताएका छन् । भेरी नगरपालिका ४ का नवराज विकको प्रेमिकालाई ल्याउन रुकुमको चौरजहारी नगरपालिका वडा नम्बर ८ सोती गएको बेला घटना भएको थियो ।

१७ वर्षीया मल्ल थरकी युवतीलाई ल्याउन जाँदा सोतीका गाउँलेहरुले आक्रमण गरेर उनीहरुको मृत्यु भएको मृतकका आफन्तजनले बताएका छन् भने साेतीका स्थानीयले भने त्यसरी आक्रमण नगरेकाे बताएका छन् । 

गाउँमा हुल बाँधेर खराब नियतका साथ आएकाहरुलाई प्रहरीमा बुझाउने गरी समात्न खोजेको उनीहरुले बताएका छन् । मृतकका आफन्तले भने गाउँलेले ढुङ्गामुढाले हानेर मारेको आरोप लगाएका छन् ।

यस घटनामा भेरी नगरपालिका ४ का नवराज विकको शव घटनाकै दिन शनिबार राति भेरी नदीकाे किनारमा भेटिएको थियो । आइतबार उनीसँगै गएका चौरजहारी नगरपालिका १ का २० वर्षीय टीकाराम विकको शव घटनास्थलबाट झण्डै २५ किलोमिटर तल जाजरकोटको भेरी नगरपालिका १२ को खोदा खोला नजिक भेटिएको थियो । 

सोमबार भेरी नगरपालिका ४ का २१ वर्षीय गणेश बुढाको पनि शव भेटिएको थियो । उनको शव पनि टिकारामको शव भेटिएको ठाउँ नजिकै भेटिएको थियाे । त्यसैगरी भेरी नगरपालिका ११ का १८ वर्षीय लोकेन्द्र सुनारको शव बुधबार दिउँसो भेटिएको थियो । उनको शव चौरजहारी १ को चौरजहारी अस्पतालको नजिक रहेको अधेरे भन्ने ठाउँमा फेला परेको थियो ।

आज बेपत्ता रहेका १७ वर्षीय गोविन्द शाहीको शव टीकाराम र गणेश बुढाको शव भेटिएकै ठाउँ नजिक भेटिएको हो । मृतकका आफन्तजनले घटनामा संलग्न २० जनाविरुद्ध किटानी जाहेरी दिएका छन् । १८ जनालाई पक्राउ गरेर रुकुम पश्चिम प्रहरीले घटनाको अनुसन्धान गरिरहेको छ ।