काठमाण्डाै – यातायात व्यवस्था विभागले साउन १ गतेबाट सवारी साधनमा इम्बोस्ड नम्बर प्लेट लगाउन सुरु गर्ने भएको छ । विभागले एक सूचना जारी गर्दै इम्बोस्ड नम्बर प्लेट लगाउन सुरु गर्ने जानकारी दिएको हो ।

गएको मङ्सिरमा सर्वोच्च अदालतले इम्बोस्ड नम्बर प्लेट अङ्ग्रेजी अक्षरमा नै राख्न सक्ने फैसला गरेपछि दुई वर्षदेखि रोकिएको इम्बोस्ड नम्बर प्लेट लगाउनकाे लागि बाटो खुलेको हो । विभागकाअनुसार इम्बोस्ड नम्बर प्लेट लिन सवारी साधनको राजस्व अनिर्वायरुपमा तिरेको हुनुपर्नेछ ।

विभागले पहिलो चरणमा वाग्मती प्रदेशमा रहेको यातायात व्यवस्था कार्यालयबाट इम्बोस्ड नम्बर प्लेट जडान गर्ने छ । सवारी साधनमा इम्बोस्ड नम्बर प्लेट जडानका लागि अनलाइनबाटै आवेदन दिन सकिने विभागले जनाएको छ ।  

इम्बोस्ड नम्बर प्लेटकाे लागि मोटरसाइकल तथा स्कुटरलाई दुई हजार पाँच सय रुपैयाँ, तीन पाङ्ग्रे सवारी साधनको लागि दुई हजार नाै सय रुपैयाँ ताेकिएकाे छ । त्यस्तै साना मझौला जीप, कार र भ्यानको लागि तीन हजार दुई सय रुपैयाँ र त्यसभन्दा माथिका गाडीमा तीन हजार ६ सय रुपैयाँ लाग्ने विभागको सूचनामा उल्लेख छ ।