नवलपरासी – पूर्व–पश्चिम राजमार्ग अर्न्तगत  नवलपरासीको दाउन्नेमा पहिरोका कारण अवरुद्ध सडक दुईतर्फी रुपमा सञ्चालनमा आएको छ । 

सामेबार रातिकाे वर्षाकाे कारण दाउन्नेको विभिन्न स्थानमा पहिरो गएपछि सडक अवरुद्ध बनेको थियो । बिहान ११ बजेको समयमा एकतर्फी रुपमा राजमार्ग सञ्चालनमा आएकाे थियाे । पहिरो पन्छाएर अहिले साँझ ५ बजेबाट दुईतर्फी रुपमा यातायात सञ्चालनमा आएको जिल्ला प्रहरी कार्यालय नवलपरासी पूर्वका प्रहरी नायब उपरीक्षक मोहनबहादुर खाँडले जानकारी दिनुभयो ।

नवलपरासी पूर्व विनयी त्रिवेणी २ मा खसेको पहिरोका कारण झण्डै ६ घण्टा राजमार्ग पूर्णरुपमा अवरुद्ध भएको थियो । पहिरोसँगै झरेको रुखले  बा १४ च ७०२० को कार र ना ६ ख १५५९ नम्बरको ट्रकसमेत च्यापिएको थियो । यसबाट कुनै मानवीय क्षति भने भएको थिएन ।

राजमार्ग पूर्णरुपमा सञ्चालनमा आएसँगै रोकिएका गाडी आफ्नो गन्तव्यतर्फ लागेका छन् ।