काठमाण्डाै – सिन्धुपाल्चोकका बाढी पीडितलाई राहत, पुनर्स्थापना तथा भौतिक संरचना पुनर्निर्माणको माग गर्दै नेकपा (एमाले) वाग्मती प्रदेश कमिटीले प्रधानमन्त्री केपी शर्मा ओलीलाई ज्ञापन पत्र बुझाएको छ । 

शुक्रवार प्रधानमन्त्री निवास बालुवाटार पुगेर नेकपा (एमाले) वाग्मती प्रदेश सङ्गठन कमिटीका अध्यक्ष आनन्दप्रसाद पोखरेलसहितको टोलीले सिन्धुपाल्चोक बाढीमा परेर ज्यान गुमाएका व्यक्तिका परिवारलाई क्षतिपूर्ति र राहत तथा विस्थापित चार सय परिवारलाई राहत र पुनर्स्थापनाको माग गर्दै ज्ञापनपत्र बुझाएको हो । 

प्रधानमन्त्री ओलीसँग नदीहरूको नियन्त्रण, खानेपानी, विद्युत्, सडक, पुल लगायतका बिग्रिएका संरचनाको तत्काल पुनर्निर्माण गर्न पनि एमाले वाग्मती प्रदेश कमिटीले ध्यानाकर्षण गराएको छ । ज्ञापनपत्रमा ज्यान गुमाएका व्यक्तिका परिवारलाई क्षतिपूर्ति दिँदै घाइतेहरूको उपचार खर्च सरकारले बेहोर्नुपर्ने, दीर्घकालीन एकीकृत पुनर्निर्माणका लागि काम प्रारम्भ गरिनुपर्ने, चार सय परिवारलाई अस्थायी बसोबासका लागि प्रति परिवार आठ बन्डल जस्तापाता तुरुन्त व्यवस्था गर्नुपर्ने, नदी किनारामा तटबन्ध निर्माण गर्नुपर्ने, बिग्रेका मोटरबाटो मर्मत गरी सञ्चालन गर्न योग्य बनाउनुपर्ने, अस्थायी झोलुङ्गे पुल बनाउनुपर्ने लगायतका माग गरिएको छ । 

नेकपा (एमाले) वाग्मती प्रदेश संगठन कमिटीका अध्यक्ष आनन्दप्रसाद पोखरेलले बाढी पीडितको पुनर्स्थापनाका लागि र खोलामा तटबन्ध गर्नेदेखि क्षतिग्रस्त घरहरूलाई मर्मत गर्नका लागि प्रधानमन्त्रीबाट सकारात्मक आश्वासन आएको र आफूहरू कार्यान्वयनको आशामा रहने बताउनुभयो ।

गएकाे असार १ गते सिन्धुपाल्चोकको मेलम्ची, याङ्ग्री र लार्के खोलामा आएको बाढीमा परेर केही मानिस बेपत्ता भएका छन् भने झन्डै चार सय परिवार विस्थापित भएका छन् । बाढीबाट विकासका पूर्वाधारहरूमा समेत क्षति भएको छ ।