लमजुङ – लमजुङका बाढी प्रभावितहरूले आफूहरूलाई पुनर्स्थापनाकाे खाँचो रहेको बताएका छन् । पालिका सरकार, प्रशासन र विभिन्न सहयोगी व्यक्ति तथा सङ्घ–संस्थाबाट राहत पाएको तर अब आफूहरूलाई बस्ने घरको खाँचो रहेको बाढी विस्थापितहरूले बताएका हुन् । 

‘बाढीले बस्ने घर नै बगायो । दिउँसोको समयमा बाढी आएकाले जसोतसो ज्यान त बचाउन सकियो’, लमजुङ दोर्दी हिलेबजारकी गंगामाया गुरुङले भन्नुभयो, ‘ज्यान त बच्यो तर बस्नलाई घर छैन । अन्यत्र घर घडेरी पनि छैन । हामीलाई बस्ने घरको खाँचो छ ।’

उहाँ झैँ बाढीले धेरै क्षति पुर्याएको हिलेबजारका विस्थापितहरू अहिले छिमेकीका घरमा डेरा गरी बसेका छन् । 

मनसुन सुरु भएसँगै गएको असार १ गते आएको बाढीले लमजुङमा पनि निकै नै क्षति पुर्याएको थियो । दोर्दी खोलामा आएको बाढीले दोर्दी गाउँपालिका ८, हिलेबाजरका १९ घर र मर्स्याङ्दी गाउँपालिकाको भुलभुलेका तीन घर बगाएको थियो ।

बाढीका जोखिममा हिलेबजारका बस्ती तथा अन्य भौतिक संरचना संरक्षणका लागि नेपाली सेनाका साथै स्थानीय दोर्दी खोलामा तटबन्धनमा जुटेको स्थानीयवासी धर्म गुरुङले जानकारी दिनुभयो ।

‘बस्ती संरक्षणका लागि  दोर्दी खोलामा तटबन्धनका लागि गाउँपालिकाले पाँच लाख र प्रदेश सरकारले १० लाख रुपैयाँ विनियोजन गरेको थियो’, उहाँले भन्नुभयो, ‘तटबन्धनमा नेपाली सेनाले पनि सघाएको थियो । अहिले पनि स्थानीयवासी निरन्तर तटबन्धनमा जुटिरहेका छन् ।’ 

यहाँका प्रभावितहरूलाई सरकारी तथा व्यक्ति, संस्था, क्षेत्रबाट पनि राहत वितरण भइसकेको उहाँले बताउनुभयो ।

‘विस्थापितहरूलाई पुनर्स्थापनाकाे खाँचो छ । यसका लागि पालिकाले पहल गरिरहेको छ’, दोर्दी गाउँपालिकाका सूचना अधिकारीसमेत रहनुभएका गुरुङले भन्नुभयो ।

मनसुनजन्य विपदमा परेका नागरिकको घरदैलोमा पुगेर राहत तथा उद्धार कार्यमा आफूहरू जुटेको प्रमुख जिल्ला अधिकारी होमप्रसाद लुईँटेलले बताउनुभयो ।