मकवानपुर – राष्ट्रपति विद्यादेवी भण्डारीले मदन भण्डारी स्वास्थ्य विज्ञान प्रतिष्ठान, हेटौँडा अस्पतालले दिने सेवा सर्वसुलभ र गुणस्तरीय हुनेमा विश्वास व्यक्त गर्नुभएको छ ।

अस्पतालको तीन तले नवनिर्मित भवनको आज मङ्गलवार उद्घाटन गर्दै राष्ट्रपति भण्डारीले प्रतिष्ठानले सर्वसुलभ र गुणस्तरीय स्वास्थ्य सेवा दिनेमा विश्वास व्यक्त गर्नुभयो । आम नागरिकलाई सर्वसुलभ ढङ्गले सेवा दिन यस प्रतिष्ठानको महत्त्वपूर्ण भूमिका हुने उहाँकाे भनाइ थियाे ।

जननेता मदन भण्डारीको नामबाट स्थापित यस अस्पतालले स्वास्थ्य सेवामा राम्रो काम गरेको राष्ट्रपति भण्डारीले बताउनुभयो । उहाँले जनस्वास्थ्य कार्यक्रमलाई नागरिककाे घरदैलोसम्म पुर्‍याउन पनि आग्रह गर्नुभयो । स्वस्थ व्यक्तिबाट मात्र उत्कृष्ट समाज निर्माण हुने भन्दै उहाँले गुणस्तरीय सेवालाई आम नागरिकसम्म पुर्‍याउनु राज्यको दायित्व भएको उहाँले बताउनुभयो । 

कार्यक्रममा बाग्मती प्रदेशका मुख्यमन्त्री शालिकराम जम्कट्टेल, पूर्वमुख्यमन्त्री डोरमणि पौडेल, स्वास्थ्य मन्त्री रामेश्वर श्रेष्ठ लगायतले अस्पतालले आफ्नाे सेवालाई अझ प्रभावकारी बनाउने विश्वास व्यक्त गर्नुभयाे ।