कोलम्बियामा ६० लाख जना मानिस प्राकृतिक ग्यासको पहुँचबाट वञ्चित भएका छन् । ज्वालामुखी नजिकैको क्षेत्रमा लागेको ‘भूमिगत आगलागी’ का कारण ग्यास पाइपलाइनहरू बन्द गर्नुपरेको र यसबाट ६० लाख जना नागरिक प्रभावित भएको खानी मन्त्रालयले जनाएको छ ।

पाइपलाइन कम्पनीका अनुसार  सेवालाई पुनः सञ्चालनमा ल्याउन कम्तीमा एक हप्ता लाग्न सक्ने सरकारी अधिकारीले बताएका छन् । कोलम्बियाको पाँच करोड जनसङ्ख्यामध्ये दुई तिहाइ नागरिक खाना पकाउने र अन्य प्रयोगका लागि इन्धनमा निर्भर छन् ।

सामाजिक सञ्जालमा शेयर गरिएका तस्बिरहरूका अनुसार केही बासिन्दाहरूले ग्यासको विकल्पमा दाउरामा खाना पकाउन थालेका छन् । यस्तै, हजारौँ मानिस विद्युतीय चुल्हो किन्नका लागि लामो लाइनमा बसेको देख्न सकिन्छ । धेरैजसो ग्यास–सञ्चालित सार्वजनिक यातायातहरूले सेवा प्रवाहलाई रोकेका खबरमा उल्लेख छ ।