काठमाण्डाै – राष्ट्रिय स्वतन्त्र पार्टीका सांसद डा. स्वर्णिम वाग्लेले अर्थमन्त्रीले बजेट निर्माणमा अनधिकृत व्यक्ति संलग्न गराएको सत्य भए आफ्नाे पार्टीले विराेध गर्ने बताउनुभएको छ ।

सोमवार काठमाण्डाैमा आर्थिक मिडिया सोसाइटीले आयोजना गरेको 'पोस्ट बजेट– अ होलिस्टिक डिस्क्लोजर विषयक अन्तक्रियामा डा. वाग्लले यस्तो बताउनुभएको हो । उहाँले चालु आर्थिक वर्षको जस्तै बजेटमा अनधिकृत व्यक्ति संलग्न भएकाे विषय सत्य नहोस् भन्ने अपेक्षा रहेको पनि बताउनुभयो । उहाँले करका दरमा नीतिगत भ्रष्टाचार हुन नहुने बताउनुभयो ।

सांसद वाग्लेले यदि करका दरमा गएकाे वर्षको जस्तो भएको सत्य भए याे विषयलाई संसदमा गम्भीररूपमा उठाउने बताउनुभयो । उहाँले अर्थमन्त्रीले करका विषयमा धेरै कुरा नबोले पनि करका विषयमा धेरै विवादहरू आएको उल्लेख गर्नुभयाे । 

वाग्लेले सरकारले विद्युतीय गाडीमा लिने अस्थिर करका दरले समस्या बनाएको बताउनुभयो । उहाँले सरकारले विद्युतीय गाडीमा स्थिर करका दर कायम गर्न आवश्यक रहेकोमा जाेड दिनुभयाे । विद्युतीय गाडीका व्यवसायीलाई कति कर्मचारी र चार्जिङ स्टेशन राख्ने भन्ने अलमल भएकाे उहाँकाे भनाइ छ । सरकारले कुनै एउटा पक्षलाई फाइदा पुग्ने गरी करका दर कायम गर्नु दुर्भाग्य भएको उहाँले बताउनुभयो । 

सांसद वाग्लेले सरकारले ल्याउने बजेटमा आयको अनुमान, व्ययको अनुमान केही पनि नमिल्ने गरेको बताउनुभयो । उहाँले सरकारले बजेटमा हावादारी रूपमा अङ्क राख्ने गरेको आरोप पनि लगाउनुभयो । उहाँले बजेटमा भनिएका कुराहरू अङ्कमा नमिल्ने भएकाले नागरिकले पत्याउने अवस्था नरहेको बताउनुभयाे । उहाँले सरकारकाे वैदेशिक अनुदान र ऋण अपेक्षाअनुसार नउठ्ने दाबी पनि गर्नुभयाे ।

वाग्लेले हरेक वर्ष बजेट घटाउनुपर्ने अवस्था बनेका कारण बजेटमाथि विश्वसनीयता कम हुँदै गएको बताउनुभयो । उहाँले अहिले सरकारले तिर्ने ब्याज बढ्दै जाँदा त्यसलाई राजस्वले धान्न नसक्ने बताउनुभयो । उहाँले वैदेशिक ऋणले नपुग्ने भएकाले ऋणको सावाँ ब्याज तिर्न आन्तरिक ऋण ऊठाउनुपर्ने अवस्था आएको बताउनुभयो ।