सन् २०२८ सम्म चिपको अभाव लम्बिने सामसङको अनुमान

दक्षिण कोरियाली प्रविधि दिग्गज सामसङ इलेक्ट्रोनिक्सले विश्वभर देखिँदै आएको चिपको अभाव सन् २०२८ सम्म लम्बिने अनुमान गरेको छ ।

समाचार संस्था रोयटर्सका अनुसार चिप बिक्रीबाट हुने नाफामा २५० गुणाभन्दा धेरै वृद्धि भएसँगै सामसङले यो अभाव अझै केही वर्ष कायम रहने सङ्केत गरेको हो ।

सामसङको यो भनाइले एआई प्रविधिमा ठूला कम्पनीहरूको खर्च घट्न सक्ने र त्यसले बजार सुस्त बनाउने भन्ने लगानीकर्ताको चिन्ता थोरै हटाइदिएको छ ।

सामसङका कार्यकारी उपाध्यक्ष जेजुन किमका अनुसार विश्वका शीर्ष ५ डेटा सेन्टर कम्पनीहरूसँग दीर्घकालीन आपूर्ति सम्झौता भइसकेको छ भने अन्य ५ ठूला कम्पनीसँग पनि सम्झौता अन्तिम चरणमा पुगेको छ । ५ वर्ष अवधिका यी सम्झौताहरूले कम्पनीको ६० देखि ७० प्रतिशत क्षमता ओगट्नेछन् ।

समसङकाे सेमीकन्डक्टर विभागले सन् २०२६ को दोस्रो त्रैमासिकमा ६१ अर्ब ७० करोड अमेरिकी डलर अर्थात् ९३ खर्ब ७७ अर्ब रुपैयाँभन्दा धेरै सञ्चालन नाफा कमाएको छ ।

तर चिपको मूल्य आकाशिएपछि सामसङकै मोबाइल युनिट भने मारमा परेको छ । यो त्रैमासिकमा कम्पनीको मोबाइल विभागले ४८ करोड ७२ लाख डलर घाटा बेहोर्नुपरेको छ ।