राष्ट्र बैंकको संरचनामा बारम्बार फेरबदल गर्न हुँदैन : अर्थमन्त्री वाग्ले

काठमाण्डाै – अर्थमन्त्री डा. स्वर्णिम वाग्लेले नेपाल राष्ट्र बैंकजस्तो स्थापित र संवेदनशील संस्थाको संरचनामा बारम्बार फेरबदल गर्न नहुनेमा जोड दिनुभएको छ ।

सङ्घीय संसद्को अर्थ समितिको आजको बैठकमा नेपाल राष्ट्र बैंक ऐन संशोधनका सम्बन्धमा भएको छलफलमा भाग लिँदै उहाँले संस्थाको कार्यक्षमता, स्थिरता र व्यावसायिकतामा जोड दिनुभएको हो । उहाँले बारम्बार फेरबदल गर्दा नकारात्मक असर पुर्‍याउनसक्ने भन्दै सचेत गराउनुभयो ।

अर्थमन्त्री वाग्लेले राष्ट्र बैंकको सञ्चालक समिति सदस्य सङ्ख्या ७ बाट बढाएर ९ पुर्‍याउने प्रस्तावप्रति असहमति प्रकट गर्नुभयो । डेपुटी गभर्नरको सङ्ख्या ३ पुर्‍याउनुपर्ने आवश्यकता नरहेको उहाँको तर्क छ ।

राष्ट्र बैंकमा अहिले १८ जना कार्यकारी निर्देशक (ई.डी.) रहेको र उनीहरू डेपुटी गभर्नर सरहकै विज्ञ हुने भएकाले २ जना डेपुटी गभर्नर नै पर्याप्त हुने उहाँको भनाइ छ ।

सञ्चालक समितिका सदस्यहरूको योग्यताका सम्बन्धमा अर्थमन्त्रीले केही खुकुलो र व्यावहारिक मापदण्ड अपनाउन सुझाव दिनुभयो । विशेषगरी अन्तर्राष्ट्रिय वित्तीय वा विकास संस्थाहरू – विश्व बैंक, एशियाली विकास बैंक वा संयुक्त राष्ट्रसङ्घ – मा उच्च तहमा काम गरेका नेपाली विज्ञहरूलाई समेट्न सक्ने गरी कानूनी प्रावधान स्पष्ट हुनुपर्ने उहाँले बताउनुभयो ।