मनसुनजन्य विपद् पूर्वतयारीको प्रगति नियमित पेश गर्न सरकारलाई राष्ट्रियसभा अध्यक्षको निर्देशन

काठमाण्डाै – राष्ट्रियसभाका अध्यक्ष नारायणप्रसाद दाहालले मनसुनजन्य विपद् पूर्वतयारीको प्रगति नियमित पेश गर्न सरकारलाई निर्देशन दिनुभएको छ ।

उहाँले राष्ट्रियसभामा पेश भएको ‘मनसुनजन्य विपद् व्यवस्थापनमा सरकारको पूर्वतयारी सम्बन्धमा’ गृहमन्त्रीको ध्यानाकर्षण गराउने प्रस्तावमा उल्लेख भएका विषयलाई प्राथमिकताका साथ कार्यान्वयन गर्न सरकारलाई निर्देशन दिनुभएको हो । यस्तै उहाँले कार्यान्वयनको अनुगमन गर्न सम्बन्धित विषयगत समितिलाई समेत निर्देशन दिनुभयो ।

राष्ट्रियसभाका सांसदहरूले मनसुनजन्य विपद् व्यवस्थापनमा सरकारको पूर्वतयारी प्रभावकारी हुन नसकेको भन्दै विपद्‍बाट हुने मानवीय तथा भौतिक क्षति न्यूनीकरणका आवश्यक तयारीमा जुट्न सरकारको ध्यानाकर्षण गराएका थिए ।

प्रस्तावमाथिको छलफलमा सहभागी नेपाली कम्युनिस्ट पार्टी (नेकपा) की सांसद मदनकुमारी शाहले विपद् पूर्वसूचना, पूर्वतयारी र उद्धार व्यवस्थापनमा उल्लेखनीय सफलता हासिल गरेका देशका अनुभवका आधारमा विपद् कार्ययोजना बनाउनुपर्ने बताउनुभयो ।

नेकपा एमालेका सांसद सोमनाथ पाेर्तेलले विपद्‍बाट हुने सम्भावित क्षति न्यूनीकरणका लागि सरकारले प्रभावकारी पूर्वतयारी गर्नुपर्नेमा जोड दिनुभयो ।

नेपाली कांग्रेसका मुख्य सचेतक पदमबहादुर परियारले हरेक वर्ष जेठ–असारदेखि मनसुनजन्य विपद् दोहोरिने भए पनि सरकारको तयारी र कार्यान्वयन अत्यन्त कमजोर हुने गरेको बताउनुभयाे । विपद्को पूर्वतयारी नगर्ने अनि विपद्पछिको उद्धार र प्रतिकार्यमा केन्द्रित हुने प्रवृत्तिले ठूलो धनजनको क्षति हुने गरेको उहाँकाे भनाइ छ ।

त्यसअघि प्रस्ताव गर्दै कांग्रेस राष्ट्रियसभा संसदीय दलकी नेता कमला पन्तले तीनै तहका सरकार तथा सरोकारवाला निकायबीच समन्वय अभावका कारण विपद् व्यवस्थापन प्रभावकारी हुन नसकेको बताउनुभयो ।