चिनियाँ रकेट प्रक्षेपणको केही सेकेन्डमै विस्फाेट

सञ्चार उपग्रह बोकेको चिनियाँ ‘लङ मार्च–सेभेन ए’ रकेट प्रक्षेपणको केही सेकेन्डमै विस्फोट भएको छ ।

चीनको दक्षिणी प्रान्त हाइनानमा रहेको वेन्चाङ अन्तरिक्ष प्रक्षेपण केन्द्रबाट स्थानीय समयअनुसार सोमवार राति ८ बजेर २ मिनेटमा प्रक्षेपण भएको रकेट विस्फोट भएको हो ।

चिनियाँ सरकारी समाचार संस्था सिन्ह्वाका अनुसार रकेटमा उडानका क्रममा प्राविधिक गडबडी देखिएपछि प्रक्षेपण असफल भएको हो । सार्वजनिक भएका भिडियोहरूमा रकेट आकाशमै विस्फोट भएको देखिएको छ ।

चीनले राष्ट्रपति सी जिनपिङले अघि सार्नुभएको ‘अन्तरिक्ष सपना’ पूरा गर्ने उद्देश्यले पछिल्ला वर्षमा अन्तरिक्ष कार्यक्रमका लागि अर्बाैँ डलर लगानी गर्दै आएको छ ।

पछिल्लो असफलताले चीनको तीव्र रूपमा अघि बढिरहेको अन्तरिक्ष कार्यक्रममाथि ध्यानाकर्षण भएको छ ।

चीनले सन् २०३० अघि चन्द्रमामा अन्तरिक्षयात्री पठाउने लक्ष्य राखेको छ । चीनको ‘लङ मार्च–सेभेन ए’ रकेट प्रक्षेपण असफल भएको यो पहिलो घटना भने होइन । यसअघि सन् २०२० मा प्रक्षेपण उडानका क्रममा प्राविधिक समस्या देखिएपछि यो कार्यक्रम रोकिएको थियो ।

चीनले अन्तरिक्ष अनुसन्धान, मानवसहितको अन्तरिक्ष अभियान र चन्द्र अन्वेषणलाई आफ्नो दीर्घकालीन रणनीतिक प्राथमिकताका रूपमा अघि बढाउँदै आएको छ ।