काठमाण्डौ उपत्यकामा गुड्ने सार्वजनिक गाडीको जानकारी दिने मोबाइल एप शुरु

काठमाण्डौ — काठमाण्डौ उपत्यकामा गुड्ने सार्वजनिक गाडीकोबारेमा जानकारी दिने मोबाइल एप्लिकेशन शुरु भएको छ ।

सार्वजनिक गाडी कुन ठाउँमा छन्, आफूले पर्खिएको ठाउँमा आइपुग्न कति समय लाग्छ लगायतकाबारेमा जानकारी दिन ‘केटीएम पब्लिक ट्रान्सपोर्ट’ मोबाइल एप्लिकेसन शुरु भएको हो ।

हिजो ‘संघीय राजधानी शहरी क्षेत्र सार्वजनिक यातायात परिषद्’ को तेस्रो बैठकमा परिषद्का अध्यक्ष एवं काठमाण्डौ महानगरपालिकाका कार्यवाहक मेयर सुनिता डंगोलले एप्लिकेसन सार्वजनिक गर्नुभयो । यो एप्लिकेसनमा जीपीएस जडान भएका करिब १ हजार २ सय गाडीका बारेमा जानकारी लिन सकिन्छ ।

यसलाई बढाउँदै लगिने योजना छ । बैठकलाई सम्बोधन गर्दै अध्यक्ष डंगोलले काठमाण्डौ उपत्यकाभित्रको यातायात प्रणालीलाई सरल, सहज र पहुँचयुक्त बनाउन रात्रिकालीन बस सेवा विस्तार गर्न र विद्यालय तथा कलेज जाने विद्यार्थीका लागि बिहानैदेखि यातायात सञ्चालन गर्न पालिकाहरुबीच वित्तीय साझेदारी आवश्यक रहेको बताउनु भएको छ ।

कार्यक्रममा ललितपुर महानगरपालिकाका मेयर एवं परिषद्का उपाध्यक्ष चिरीबाबु महर्जनले सार्वजनिक बस चढ्ने यात्रुले वास्तविक सहजता महसुस गर्ने गरी प्रणालीमा सुधार ल्याउन आवश्यक रहेको बताउनुभयो ।