नेपाललाई वित्तीय सहायता दिन ‘लस एन्ड ड्यामेज’ कोष सकारात्मक

काठमाण्डौ – जलवायु परिवर्तनका प्रतिकूल प्रभावका कारण भोटेकोशी नदीमा आएको बाढीबाट भएको क्षतिपछि नेपालले मागेको तत्काल वित्तीय सहायता उपलब्ध गराउनेबारे ‘फन्ड फर रेस्पोन्डिङ टु लस एन्ड ड्यामेज’ (एफआरएलडी) बोर्डले सकारात्मक प्रतिक्रिया जनाएको छ ।

अर्थमन्त्री स्वर्णिम वाग्ले र कृषि, वन तथा वातावरणमन्त्री गीता चौधरीले ११ दिनअघि पठाएको पत्रको जवाफ दिँदै एफआरएलडी बोर्डका सहअध्यक्ष क्यामिला मिनर्भा रोड्रिग्वेज ताभारेज र जर्ज बोरस्टिङले सम्भावित सहयोगका उपाय खोज्न तयार रहेको बताएका हुन् ।

नेपालको जरुरी अनुरोधलाई यथाशक्य छिटो सम्बोधन गर्न कोषका सञ्चालक समितिसँग संलग्न भइरहेको भनी पत्रमार्फत आश्वस्त पारिएको छ । प्रतिक्रिया सकेसम्म द्रूत र अर्थपूर्ण होस् भन्नका लागि सञ्चालक समितिले कोषको विद्यमान जनादेश, ढाँचा, संरचना, नीति र प्रक्रियाहरू भित्रका विकल्पहरूमा विचार गर्न सिफारिस गरेको जनाएको छ ।

नेपालले गरेको अनुरोधलाई एसिया, अफ्रिका, ल्याटिन अमेरिका, अति कम विकसित देश तथा साना टापु विकासशील राष्ट्रहरूको प्रतिनिधित्व गर्ने देश तथा समूहहरूले बलियो समर्थन र ऐक्यबद्धता जनाएका छन् ।

एफआरएलडी बोर्डमा संयुक्त राष्ट्रसंघीय जलवायु परिवर्तनसम्बन्धी संरचना महासन्धि र पेरिस सम्झौताका पक्ष राष्ट्रहरूको प्रतिनिधित्व गर्ने २६ सदस्य छन् ।