म्याग्दीकाे अन्नपूर्णमा ३० वटा पहिराेकाे अध्ययन

काठमाण्डाै – यस वर्षको मनसुनजन्य विपद‍्बाट म्याग्दीको सबैभन्दा धेरै प्रभावित अन्नपूर्ण गाउँपालिका–५ पाउद्वारका पहिरोको प्रारम्भिक भौगर्भिक अध्ययन गरिएको छ ।

पाउद्वारसहित अन्नपूर्ण गाउँपालिकाको ५ र ६ नम्बर वडामा पर्ने नेपाने, गिवाङ, झारवाङ, किन्दु, धस्केखोरे, सोभित्ता, भुवानथान, बिरौटा, शिख, हल्लेखर्कको पहिरोको अध्ययन गरिएको हो ।

भूगर्भविद् लेखप्रसाद भट्टले स्थलगत निरीक्षण, प्रभावितसँग छलफल, नमूना सङ्कलनका साथै ड्रोनको सहायताले पहिरोको अध्ययन गरिएको बताउनुभयो ।

अन्नपूर्ण गाउँपालिकाकी उपाध्यक्ष दिवा तिलिजा पुन, ५ नम्बर वडाका अध्यक्ष राजेश तिलिजा पुन, गाउँपालिकाका प्राविधिक शाखा प्रमुख र भूगर्भविद्को टोलीले १०० मिटरभन्दा धेरै लम्बाइमा खसेका झन्डै ३० वटा पहिरोको अध्ययन गरेका छन् । 

पाउद्वार गाउँमाथिको पहिरो, बढी चिरा परेको ठाउँ तथा रुख ढल्केकाले थप जोखिम देखिएको भूगर्भविद् भट्टले बताउनुभयो । उहाँका अनुसार प्रारम्भिक रूपमा यस पहिरोबाट १५ घर उच्च जोखिममा छन् । गाउँमाथिको र अन्य पहिरोले बस्तीलाई बगाउन सक्ने जोखिमको विषयमा सुझावसहितको विस्तृत प्रतिवेदन गाउँपालिकालाई बुझाउने भट्टले बताउनुभयो ।

अन्नपूर्ण गाउँपालिका–५ गिवाङमा गएकाे असोज ११ गते पहिरोमा पुरिएर दुई जनाको ज्यान गएकाे थियो । यस्तै २८ वटा घरमा पूर्ण क्षति भएको वडाध्यक्ष राजेश तिलिजाले बताउनुभयो । दुई सयभन्दा धेरै घर रहेको पाउद्वार गाउँ चारैतिरबाट पहिरोले घेरिएको छ । अन्य बस्तीमा पनि पहिरोको जोखिम उत्तिकै छन् ।

पाउद्धार जोड्ने सडक अझै अवरुद्ध छ । स्थानीयवासीले श्रमदान गरेर पैदलमार्ग खुलाएका छन् । अस्थायी रूपमा विद्युत् आपूर्ति भएको छ । खानेपानी मर्मतका लागि श्रमदान अभियान सञ्चालन भएको छ । 

असोज ११ गते हेलिकप्टरबाट उद्धार गरेर अन्नपूर्ण गाउँपालिका–६ घारस्थित आश्रयस्थलमा लगिएका ११५ जना पाउद्वारवासी पछिल्लो समय आफन्त, छिमेकीको खाली घर र सुरक्षित ठाउँमा टहरा बनाएर बस्न थालेका छन् । शिखको आश्रयस्थलमा रहेका ३५ घरपरिवारमध्ये धेरैजसाे आफन्तको घरमा सरेका छन् । 

भूगर्भविद्ले दिने सुझाव र अध्ययन प्रतिवेदनको आधारमा पुनर्निर्माणको काम अघि बढाउने अन्नपूर्ण गाउँपालिकाकी उपाध्यक्ष दिवा तिलिजा पुनले बताउनुभयो । गाउँपालिकाका अन्य स्थानका पहिरोको पनि भौगर्भिक अध्ययनका लागि पहल भइरहेको उपाध्यक्ष पुनले बताउनुभयो ।