पोखराका ९ वटै ताल जोड्ने साइकल ट्रेल, १ अर्ब ५२ करोडको आयोजना अघि बढाइँदै

काठमाण्डौ – पोखरालाई दिगो पर्यटनको गन्तव्यका रूपमा विकास गर्ने लक्ष्यसहित पोखरा महानगरपालिकाले महत्वाकांक्षी आयोजना अघि बढाएको छ ।

पोखराका ९ वटै ताललाई साइकल ट्रेल तथा सडक सञ्जालमार्फत जोड्ने गरी १ अर्ब ५२ करोड रुपैयाँ लागतको आयोजना अगाडि बढाउन लागिएको हो । पोखरा महानगरपालिकाका मेयर धनराज आचार्यकाअनुसार वडा–६ को फेवाताल क्षेत्रबाट शुरु हुने यो ट्रेलले पोखराका ९ वटै ताललाई आपसमा जोड्नेछ ।

साइकल लेनसहित निर्माण हुने ट्रेल सम्पन्न भएपछि पर्यटकले साइकल तथा अन्य गाडीमार्फत पोखराका सबै तालसम्म सहजै पुग्न सक्नेछन् । आयोजना कार्यान्वयनमा आएपछि ओझेलमा परेका ताल तथा आसपासका पर्यटकीय क्षेत्रसमेत चलायमान हुने महानगरको अपेक्षा छ ।

यसले पोखरा आउने पर्यटकको बसाइ अवधि कम्तीमा दुई दिन थप लम्ब्याउन भुमिका खेल्ने मेयर आचार्यले बताउनुभयो । उहाँकाअनुसार पर्यटकलाई फेवातालमा मात्रै सिमित नराखी पोखराका अन्य ताल तथा पर्यटकीय गन्तव्यसम्म पुर्‍याउन आयोजना महत्वपूर्ण हुनेछ ।

पोखरालाई पर्यटनको राजधानी घोषणा गरिसकिएको उल्लेख गर्दै मेयर आचार्यले प्रकृति, संस्कृति र शाहसिक पर्यटनलाई एकीकृत रूपमा विकास गर्न महानगरले प्राथमिकताका साथ काम गरिरहेको बताउनुभयो ।