नेभिगेशन
बिहीबार, मंसिर ३, २०८३

ट्रम्प, सी र पुटिनबीच आज ऐतिहासिक भेटवार्ता हुँदै

अमेरिकी राष्ट्रपति डोनाल्ड ट्रम्प चीनको दक्षिणी शहर सेन्जेन पुग्नुभएको छ ।

एशिया–प्रशान्त आर्थिक सहयोग (एपेक) शिखर सम्मेलनमा सहभागी हुन हिजो चीन पुगेका ट्रम्पको भ्रमणलाई विश्व राजनीतिमा महत्वपूर्ण रूपमा हेरिएको छ ।

उहाँले आज चिनियाँ राष्ट्रपति सी जिनपिङ र रुसी राष्ट्रपति भ्लादिमिर पुटिनसँग ऐतिहासिक त्रिपक्षीय वार्ता गर्ने कार्यक्रम रहेको अन्तर्राष्ट्रिय सञ्चारमाध्यमले जनाएका छन् । अमेरिका, चीन र रुसका राष्ट्रप्रमुखबीच हुन लागेको यो पहिलो त्रिपक्षीय शिखर बैठक हो ।

विश्वका तीन ठूला आणविक शक्ति राष्ट्रका नेताहरू एकै ठाउँमा बसेर विश्व सुरक्षा, आणविक हतियार नियन्त्रण र अन्तर्राष्ट्रिय द्वन्द्वका विषयमा छलफल गर्न लागेका हुन् । ट्रम्प सेन्जेन पुग्दा हिजो चिनियाँ राष्ट्रपति सी आफैँ विमानस्थल पुगेर स्वागत गर्नुभएको छ ।

सीले राष्ट्रपतिको कार्यकालमा पहिलोपटक कुनै विदेशी नेतालाई विमानस्थलमै पुगेर स्वागत गरेको अन्तर्राष्ट्रिय सञ्चारमाध्यमले उल्लेख गरेका छन् । यसअघि अमेरिका भ्रमणमा जाँदा सीलाई ट्रम्पले पनि विशेष स्वागत गर्नुभएको थियो । यसपटक सीले त्यसैको प्रत्युत्तर स्वरूप विशेष आतिथ्यता देखाउनुभएको विश्लेषण भइरहेको छ ।

आज ट्रम्प र पुटिनबीच छुट्टै भेटवार्ताको तयारी समेत भएको अमेरिकी अधिकारीले पुष्टि गरेका छन् । त्यसपछि सी, ट्रम्प र पुटिनबीच त्रिपक्षीय छलफल हुनेछ ।

तीन नेताबीचको बैठकमा मुख्यत आणविक हतियार नियन्त्रण, रुस–युक्रेन युद्ध, अमेरिका–इरान युद्ध, व्यापार युद्ध र प्रविधि प्रतिस्पर्धा लगायतका विषयमा छलफल हुने अपेक्षा छ । अन्तर्राष्ट्रिय समुदायले यो बैठकलाई चासोका साथ हेरिरहेको छ ।

अमेरिका, चीन र रुसबीचको सम्बन्ध विश्व शक्ति सन्तुलनका दृष्टिले महत्त्वपूर्ण मानिन्छ । यी तीन देशबीच हुने सहमति वा असहमतिले युक्रेन युद्ध, मध्यपूर्वको तनाव, आणविक हतियार नियन्त्रण, विश्व व्यापार र अन्तर्राष्ट्रिय सुरक्षा व्यवस्थामा प्रभाव पार्न सक्ने विश्लेषकहरुको भनाइ छ । 

प्रकाशित मिति:
थप विश्व