पाँचथर –मिक्लाजुङ गाउपालिका ५ को कुरुम्बा क्षेत्र सुन्तला खेतीको लागि पकेट क्षेत्र हो । यहाँका किसानले यस वर्ष सुन्तला बेचेर मनग्य आम्दानी गरेका छन् ।

यस क्षेत्रका २ सय ५० घर किसानहरु सुन्तला खेतीमा व्यावसायिक बनेका छन् । तथ्याङ्कअनुसार यहाँ ५७ हेक्टर क्षेत्रफलमा सु्न्तलाको व्यावसायिक खेती गरिएको छ । 

२० रोपनी जमिनमा सुन्तला खेती गर्दै आउनु भएकी मिक्लाजुङ गाउँपालिका ५ कुरुम्बाकी इन्द्रकुमारी लावतीले यस वर्ष सुन्तला बेचेर सात लाख रुपैयाँ आम्दानी गरेको बताउनु भयो । उहाँले भन्नुभयो, ‘२० रोपनी जमिनमा पाँच सय बोट सुन्तला खेती गरेको छु, यस वर्ष अघिल्ला वर्षको जति राम्रो फल लागेन, त्यसैले आम्दानी अलि कम भयो ।’

इन्द्रकुमारी जस्तै यहाँका धेरै किसानले सुन्तला बेचेर बर्सेनि लाखाैँको आम्दानी गर्दै आएका छन् । यस क्षेत्रमा सुन्तला खेती विस्तार पनि बर्सेनि बढ्दै गइरहेको छ । यस क्षेत्रमा सुन्तला कति उत्पादन हुन्छ ? र कति आम्दानी हुन्छ ? भन्ने यकिन तथ्याङ्क नभए पनि यहाँका किसानको आय आर्जनको मुख्य स्रोत सुन्तला खेती नै हो । 

सुन्तला बिक्री गरेर यहाँका किसानले यस वर्ष झण्डै दुई करोडको हाराहारीमा आम्दानी गरेको मिक्लाजुङ गाउँपालिका ५ का वडाध्यक्ष अविसान लावतीले बताउनु भयो । 

यहाँ उत्पादन हुने सुन्तला स्थानीय बजार रविसँगै तराईका बजारहरु बिर्तामोड, दमक र विराटनगरसम्म पुग्छ । 

सुन्तला खरिद गर्न बगानमै पुग्छन् व्यापारी

यहाँका किसानलाई सुन्तला बिक्रीको लागि कुनै दुःख छैन । सुन्तला खरिद गर्न व्यापारीहरु किसानको बगानमै पुग्छन् । आफ्नो बगानमा फलेको सुन्तला व्यापारी बगानमै आएर ७ लाखमा खरिद गरेर लगेको किसान तेजबहादुर लावतीले बताउनु भयो ।

यहाँ उत्पादन भएको ६० लाख मूल्य बराबरको सुन्तला यस वर्ष काठमाण्डौमा लगेर बेच्ने योजनामा रहेको स्थानीय व्यापारी देवराज लावतीले भन्नुभयो । ‘यहाँ उत्पादन हुने सुन्तला तराईका बजारसँगै काठमाण्डौ पनि माग बढ्दो रहेकोले यस वर्ष खरिद गरेका सुन्तला काठमाण्डौ लगेर बेच्ने योजना बताएको छु’, लावतीले भन्नुभयो । 

कुरुम्बामा उत्पादन हुने सुन्तलाको प्रवद्र्धनको लागि यहाँ गएको मंसिर २०, २१ र २२ गते सुन्तला महोत्सवसमेत आयोजना गरिएको थियो । यस क्षेत्रमा सुन्तला खेतीलाई टिकाइ राख्न र थप विस्तार गर्नका लागि गाउँपालिकाले आर्थिक तथा प्राविधिक सहयोग गरिरहेको मिक्लाजुङ गाउँपालिकाका अध्यक्ष अमरराज माखिमले बताउनु भयो ।