स्पेनिस क्लब बार्सिलोनाले फ्रेन्च क्लब बोर्डोका विङ्गर माल्कमलाई अनुबन्ध गरेको छ । रोमाले पछ्याइरहेको माल्कमलाई बार्सिलोनाले ३६.५ मिलियन पाउण्डमा बार्सिलोना भित्राएको हो ।

२१ वर्षे विङ्गर आबद्ध गर्नका लागि रोमाले प्रकृया अघि बढाएको थियो । तर उनलाई बार्सिलोनाले पाँच वर्षका लागि सम्झौता गरेको छ । सोमबारमात्रै रोमाले माल्कमको अनुबन्ध प्रकृया पूरा हुन मेडिकल र ब्यक्तिगत सम्झौता मात्र बाँकी रहेको जनाएको थियो ।

बार्सिलोनामा सम्झौता भएपछि रोमाका निर्देशक मोन्चीले कानुनी प्रकृया सुरु गर्ने बताएका छन् । ‘माल्कमका एजेन्ट फर्नान्डो गार्सियाले सबै कुरा मिलिसकेको र खेलाडी साँझसम्ममा रोमा पुग्ने बताएका थिए । तर केही समयपछि एजेन्टले राम्रो प्रस्ताव आएकाले माल्कमले बार्सिलोना जाने निर्णय गरेको बताएका थिए ।’

बुधबार माल्कमले बार्सिलोनामा मेडिकल परीक्षण गर्नेछन् । ब्राजिल यू–२३ र यू–२० को टिममा परेका माल्कमले बोर्डोका लागि ८४ लिग खेलमा २० गोल र १३ एसिस्ट गरेका थिए ।

यो समरमा बार्सिलोनाले भित्राउने खेलाडीमा माल्कम दोस्रो हुन् । यसअघि बार्सिलोनाले ग्रेमियोबाट मिडफिल्डर अर्थर अनुबन्ध गरेको थियो ।