मल अभावले सप्तरीका किसानहरुलाई सास्ती

एक बोरा मलका लागि तीन–चार दिनसम्म लाइन बस्नुपर्ने

साउन ११, २०७५ शुक्रबार ९:७:४ | शुभनारायण यादव

सप्तरी – साउनको दोस्रो साता बित्नै लागेको छ तर वर्षा भएको छैन । चर्को घाम र प्रचण्ड गर्मीका कारण धानका बीउ सुक्न थालेको छ । मोटर, पम्पिङ्गसेटको भरमा रोपिएका धान खेतहरुमा पानी नपरेपछि जमिन चिरा पर्न थालेको छ भने रोपिएका बीउ मर्न थालेका छन् ।

धानबाली लगाउने समय बित्नै लाग्दा यसपाली खडेरी पर्ने हो कि भन्ने चिन्ताले सताउन थालेको छ सप्तरीका किसानहरुलाई । खेत रोप्न नपाएको पीडा त किसानहरुलाई छँदैछ, त्यसमाथि रासायनिक मल नपाउँदा निकै समस्या भोग्नुपरेको छ ।

सप्तरीमा गहुँ बाली लगाउने बेला होस् या धानबाली लगाउने बेला । यहाँका किसानका लागि मल नपाउनु प्रमुख समस्या बन्ने गरेको छ । भोट दिएर जिताएका जनप्रतिनीधिहरु पनि किसानको समस्याप्रति गम्भीर नभएको रुपनी गाउँपालिका वडा नम्वर–५ बसबिट्टीका मोहम्मद सकुर बताउनुहुन्छ । उहाँ चारदिनदेखि मल लिनका लागि प्रत्येक दिन बिहानै राजविराज धाउने गर्नुहुन्छ ।

सकुर बिहानदेखि दिनभरी लाइनमा बस्नुहुन्छ । साँझपख मल सकिएको भनी कर्मचारीले सूचना दिएपछि निराश भएर फर्केको धेरै दिन भइसक्यो उहाँ भन्नुहुन्छ ‘शासन व्यवस्था त बदलियो तर व्यहार बदलिएको छैन, हिजो जे थियो आज पनि त्यस्तै हालत छ ।’ अधिकारप्राप्तिकालागि आन्दोलन भएको चर्चा गर्दै आफूहरुले भोट दिएर जिताएका प्रतिनिधिहरुले समेत यसतर्फ चासो नदेखाएको उहाँले गुनासो गर्नुभयो ।

किसानहरुलाई थप सुविधा दिनुपर्नेमा प्रदेश सरकारले आश्वासनमात्र दिने गरेकोे छिन्नमस्ता गाउँपालिका गाउँपालिका–५ का गणेश शर्मा बताउनुहुन्छ । उहाँ भन्नुहुन्छ ‘यहाँ त पैसा तिरेर पनि मल पाउन गाह्रो छ, अब त लाग्छ खेती छाडिदिउँ तर वर्षभरि बालबच्चाको भरणपोषण कसरी गर्ने भनी चिन्ताले पिरोल्ने गर्छन् ।’

कृषि सामग्री केन्द्र लिमिटेडले सहकारी संस्थामार्फत सप्तरीका किसानहरुलाई रसायनिक मल उपलब्ध गराउँदै आएका छन् । तर, सुपथ मूल्यमा विक्री गर्ने भनी लगिएको रसायनिक मल सहकारी संस्थाले मनपरी मूल्य बढाएर विक्रीवितरण गर्ने गरेको किसानहरुको गुनासो छ ।

रोपाइँ गर्न चटारो रहेको मौकाको फाइदा उठाउँदै सहकारीले डीएपी, युरिया र पोटास मलमा निर्धारित मूल्यभन्दा बढी प्रतिबोरा ४ सयदेखि ६ सय रुपैयाँसम्म बढी मूल्यमा बिक्री गर्ने गरेको किसानहरु बताउँछन् ।

धान रोपाइँको सिजनमा डिएपी, युरिया र पोटास गरी झण्डै १५ हजार मेट्रिक टन रसायनिक मलको आवश्यकता रहे पनि आवश्यकता अनुसार कृषि सामाग्री केन्द्रले आपूर्ति नदिदाँ जिल्लामा रसायनिक मलको अभाव भएको जिल्ला सहकारी संघको भनाई छ ।

जिल्ला सहकारी संघ सप्तरीका प्रबन्धक रमेश कुमार गुप्ताका अनुसार कृषि सामाग्री केन्द्रले आपूर्ति नदिदाँ सप्तरीमा हालसम्म २ हजार मेट्रिक टन रसायनिक मल मात्रै वितरण गर्न सकिएको हो ।

यता, कृषि सामग्री केन्द्र लिमिटेड राजविराजले सुरुमा डीएपी मल केही रुपमा अभाव रहे पनि युरिया, डीएपी र पोटास गरी ८ हजार मेट्रिक टन जिल्लाका सहकारीलाई वितरण गरिरहेको दावी गरेका छन् ।

किसानलाई मारमा पार्ने गरी रसायनिक मलको कालोबजारी भैरहेको विषयमा गुनासो आएकोले अनुगमन थालिएको मलखाद्य आपूर्ति समितिका संयोजक प्रमुख जिल्ला अधिकारी सुरेन्द्र पौडेलले बताउनुभयो ।

अन्तिम अपडेट: कात्तिक १४, २०८१

Disclaimer:

उज्यालोका खबर फेसबुक, इन्स्टाग्राम, एक्स ट्वीटर र यूट्युबमा हेर्न तथा उज्यालो रेडियो नेटवर्क ९० मेगाहर्जसँगै देशभरका विभिन्न एफएम रेडियोहरुबाट पनि सुन्न सकिन्छ । उज्यालोमा प्रकाशित तथा प्रसारित सामग्री यस संस्थाको स्वतन्त्र, निष्पक्ष र तथ्यमा आधारित सम्पादकीय नीतिबाट निर्देशित छन् र गल्ती नहोस भन्नेमा सचेतता अपनाएर तयार पारिएका छन् । प्रकाशन र प्रसारण भएका सामग्रीको विषयमा तपाईको गुनासो, प्रतिकृया र सुझावलाई हार्दिक स्वागत गर्दै गल्ती भएको पाईएमा तत्काल सच्याइने जानकारी गराईन्छ । उज्यालोबाट प्रकाशन तथा प्रसारण हुने सामग्रीको प्रतिलिपि अधिकार यस संस्थामा निहीत रहेकोले संस्थाको अनुमति विना समाचारको नक्कल उतार्ने, पुनरुत्पादन, प्रशारण वा फोटोकपी गर्न पाइदैन । कसैले त्यसो गरेमा कानूनी कार्वाही हुन सक्नेछ ।

शुभनारायण यादव

शुभनारायण यादव सप्तरीका उज्यालो सहकर्मी हुनुहुन्छ ।

तपाईको प्रतिक्रिया

नाम (अनिवार्य)

इमेल (अनिवार्य) (गोप्य राखिनेछ)

प्रतिक्रिया दिनुहोस्