काठमाण्डौ - कोरोनाको संभावित महामारी रोक्न खटिएका स्वास्थ्यकर्मीहरुले सामान्य सुरक्षाका उपकरण समेत नहुँदा डराइ डराइ काम गर्नुपरेको बताएका छन् ।

ज्वरो नाप्ने मेसिन, पीपीई लगायतको व्यवस्था नहुँदा ज्वरो आएका बिरामीको स्वास्थ्य जाँचमा समेत समस्या भएको स्वास्थ्यकर्मीहरुले बताएका छन् । जिल्ला अस्पताल जाजरकोटका अस्पताल विकास समिति अध्यक्ष धर्मशिला खत्रीले सङ्क्रमण देखिएको अवस्थामा काम गर्ने कुनै उपकरण नभएको बताउनुभयो ।

प्रदेश सरकारले पीपीई पठाए पनि पीपीईमा हुनुपर्ने सामग्री नभएको, ज्वरो नाप्ने मेसिन नहुँदा सामान्य थर्मोमिटरले नाप्नु परेको तथा औषधिसमेत अभाव रहेकोले स्वास्थ्यकर्मीहरुलाई कार्यक्षेत्रमा जानै चुनौती रहेको बताउनुभयो ।

यस्तै जिल्ला अस्पताल भोजपुरका प्रमुख डाक्टर पवित्रा श्रेष्ठले पनि प्रदेश सरकारले अपुरो पीपीई पठाएको गुनासो गर्नुभयो । उहाँले सुरक्षाका उपकरण नहुँदा स्वास्थ्यकर्मीहरुले जोखिम मोल्नुपरेको बताउनुभयो ।

जिल्ला स्वास्थ्य कार्यालय पाल्पाका निमित्त प्रमुख विश्वनाथ न्यौपानेले पनि स्वास्थ्यकर्मीहरुको लागि सुरक्षाका उपकरण नभएकोले काम गर्न असहज भएको बताउनुभयो । जुम्लाका स्वास्थ्यकर्मीहरुले पनि सुरक्षाका उपकरण नहुँदा अहिले आफुहरुले आगोमा हात हालिरहेको अनुभूति भएको बताएका छन् ।

चाँडै सर्ने कोरोना भाइरसबाट सबभैन्दा धेरै स्वास्थ्यकर्मीहरु जोखिममा हुन्छन् । बिरामीको सबैभन्दा नजिक उनीहरु रहने भएकोले स्वास्थ्यकर्मीलाई खटाउनुअघि उनीहरुको सुरक्षाको उचित व्यवस्था गर्नुपर्ने भएपनि अहिले धेरै स्वास्थ्यकर्मी सुरक्षामा उपकरण विनै काममा खटिन बाध्य भएको बताउँछन् ।