डोटी – जिल्लाका विभिन्न क्वरेण्टीनमा रहेका २ सय १३ जनामा कोरोना भाइरसको आशङ्कामा गरिएको  र्यापिड डाइग्नोस्टिक टेस्ट (आरडिटी) को नतिजा ‘नेगेटिभ’ आएको छ । 

विभिन्न क्वरेण्टीनमा रहेका १ सय ९१ जना पुरुष र २२ जना महिला गरी २ सय १३ जनामा रगतबाट गरिने आरडिटी जाँच गर्दा सबैमा ‘नन रिएक्टिभ’ नतिजा आएको स्वास्थ्य कार्यालय डोटीका प्रमुख रमेश मलासीले जानकारी दिनुभयो । 

उहाँका अनुसार जिल्लाका आदर्श गाउँपालिका, बडीकेदार गाउँपालिका, सायल गाउँपालिका र बोगटान फुड्सिल गाउँपालिकाका क्वरेण्टीनमा आरडिटी गरिएको हो । 
त्यस्तै शनिबारदेखि होम क्वरेण्टीनमा बसेकाहरुको समेत आरडिटी परीक्षण सुरु गरिएको  स्वास्थ्य प्रमुख मलासीले बताउनुभयो । 

त्यसैगरी, सुदूरपश्चिम प्रदेशको तराईका दुई जिल्ला कैलाली र कञ्चनपुरमा गरिएको कोरोना जाँचको  र्यापिड टेस्टमा २ सय ३८ जनाको रिपोर्ट ‘नेगेटिभ’ आएको छ । प्रादेशिक प्रयोगशाला धनगढीका प्रतिनिधिसहितको टोलीले र्यापिड टेस्ट किटमार्फत जाँच गरेको थियो ।